Anda di sini

‘Taib-The Visionary’ ti ngundan 810 lambar deka dipenyadi kena 21 Mei

Advertisement

DEKA DIPENYADI: Siva mandangka bup ke ngundan 810 lambar, nyerita pasal Taib deka dipenyadika kena 21 Mei beserimbai enggau hari pengada Taib ti ke-78.

KUCHING: Sebuah bup ke nusui cherita pasal ex-Kepala Menteri Pehin Sri Abdul Taib Mahmud, deka dipenyadika Kepala Menteri, Tan Sri Datuk Amar Adenan Satem kena 21 Mei tu ila, beserimbai enggau hari pengada Taib ti ke-78.

Bup ke ditulis seiku penulis ke mayuh peneleba ngarang berita sereta ketuai raban editor sebuah kompeni surat kabar di menua tu, Siva Kumar G. nulis bup ke ngundan 810 lambar sereta urung 500 iti pasal Taib.

Siva ti mega Ketuai Pemesai Eksekutif sereta Pengarah Urusan Asia PR madah, bup tu enda sebaka enggau bup ke terubah iya ditulis iya ba taun 1991, ‘Taib-A Vison for Sarawak’ laban sekali tu ku iya, 40 peratus undan bup nya nusui cherita Taib ke sama enggau orang bukai betapi enggau penusah ke nuntung sida sebilik, lalu 60 peratus agi bekaul enggau pangku pengawa iya nyadi Kepala Menteri Sarawak dalam kandang 33 taun.

Taib pan baka orang bukai mega, betapi enggau penusah ke nuntung sida sebilik, alai dalam taun 2006, iya sakit, lalu ditangkan enggau menyadi lelaki iya parai, lalu udah nya indai iya, sereta berapa taun udah nya bini iya (Datuk Amar Hajah Laila Taib).

Dalam timpuh 33 taun mangku pengawa nyadi Kepala Menteri, iya ukai betapi enggau pekara ke muntang tang mayuh isu sereta kontroversi udah diputarka iya.

Diatu, taja pan mangku pengawa nyadi Tuai Megai Menua (TYT), iya agi bisi kaul enggau perintah menua tu, alai iya mega nyadi Penyanding Penemu menua tu,” ku Siva.

Iya madah munyi nya ba aum media di Hotel Hilton kemari, bekaul enggau bup tu ke deka dipenyadi kena 21 Mei tu nyerumba pengawa ngintu hari pengada Taib.

Bup ‘Taib-The Visionary’ tu digaga dalam timpuh 3 taun maya Taib agi mangku pengawa nyadi Kepala Menteri, penusah sereta pengelantang ke ditapi sida sebilik sereta nyadi orang ke berat dalam pemansang menua tu, baka ke diatu.

Mayuh ari randau enggau ex-Kepala Menteri tu digaga enggau iya empu (Taib) ke nusui peneleba, nyaut sebarang tanya nyengkaum randau enggau urung 20 iku ‘personalities’ ke ukai semina kaban politik aja tauka bisi kaul enggau Taib tang nyengkaum ngelawa sekeda endur di menua tu,” ku Siva.

Bup ti dichelak tu enda sebaka enggau biografi kemaya hari tu, iya deka mantaika bup ke bechura, mayuh gambar, nusui mayuh peneleba iya nyadi orang ke pengabis lama mangku pengawa perintah, entara orang ke mayuh peneleba gawa ba renggat Perintah Besai sekumbang Menteri Besai keterubah Malaysia, Tunku Abdul Rahman Putra Al-Haj.

Bup tu mega deka dichelak dalam tiga jaku, English, Bahasa Malaysia enggau China ke deka dikeluar pemayuh dua kali lipat ari bup keterubah, iya nya dalam 20,000 buah.

Nyangka pekara ke narit ati dalam bup tu, iya nya penusah, pengelantang iya nyadi tuai ruang bilik, mangku pengawa nyadi Kepala Menteri, isu, penanggul enggau kontroversi ke ditapi iya.

Taja pia, Taib nyadi orang ke berat dalam pemansang menua Sarawak diatu. Enti ukai ketegal iya, Sarawak enda baka Sarawak ke diatu,” ku iya.

Advertisement