KUCHING: Seraban indu ari Parti Demokratik Progresif Sarawak (SPDP) pampang Satok ti betuaika ketuai Indu pampang nya, Kaunsilor Manjeet Sidhu bisi nemuai ngagai dua iku indai tunggal, meri bantu kena ngelempungka penusah ke ditapi sida, kelebih agi kededua indai tunggal ke ngembuan anak ke nyelai pendiau.
Penemuai sida ngagai sitak Mambong, ngabas Sentika anak Newis enggau anak iya ke berumur 4 taun, Bryan McFadden anak Lapam, ke betapi enggau penusah bedau nemu bejalai sereta betapi enggau penusah enda ulih makai sereta ngirup.
Ba pejalai nya mega, raban indu SPDP pampang Satok bisi nemuai ngagai Colina Rundi anak Rinyon ke bisi tiga iku anak, lalu seiku ari nya, nyelai pendiau, Peterson Mael, 10.
Peterson diberi kerusi roda ulih seiku orang ari gerija SIB lalu ba kededua pejalai nya mega, bala indu ari SPDP Mambong enggau Satok nyuaka bantu pemakai, pampers, tusu, duit tulung sereta sekeda bantu bukai.
“Pengawa nemuai ngabas sida ke tusah sigi seruran digaga kami, tanda kitai ibuh ke pangan diri. Nasit kitai manah laban komuniti kitai orang ke siru, tambah bantu ari perintah pan muntang diulihka,” ku Manjeet ke bisi mantu kededua piak ruang bilik tu minta tulung ari Opis Pengintu Pengelantang Pendiau (JKMS).