Kaban dalam SUPP enggau SPDP dilalau bebaik sereta mutarka penyarut runding enggau lengkas
Dikarang Jacqueline David //
KUCHING: Taja pan Opis Pengerijista Gerempung (ROS) udah madah, Parti Sa’ati Rayat Sarawak (SUPP) enda dikinsil bedau lama tu tadi, laban agi meri peluang ngagai kaban sereta pemesai parti nya bebaik baru, tang Kepala Menteri Tan Sri Datuk Amar Adenan Satem madah, sebarang penyarut ke nyadi dalam parti kelebih agi bekaul enggau SUPP sereta Parti Demokratik Progresif Sarawak (SPDP) ke enda diputar enggau jampat, iya empu deka (masuk campur) dalam pekara nya.
“Pesan aku ngagai sida, bebaik baru, nya ke seruran disebut aku. Ukai pemerat gaya sebut aku tang ngemeratka pekara ti patut diputarka sida,” ku Adenan.
Iya madah munyi nya ba aum media pengudah nyadi chairman aum kaunsil Kereja Tinggi Parti Pesaka Bumiputera Bersatu Sarawak (PBB) di Indu Opis PBB di Jalai Bako ditu, kemari.
Adenan ti mega Chairman Barisan Nasional (BN) Sarawak madah ba formula ke dipinta Chairman SUPP Sibu ti mega nyadi Menteri Wang Kedua sereta Menteri Opis Kaunsil Kandang Menua enggau Pemansang Komuniti, Dato Sri Wong Soon Koh ke minta ‘Formula 50/50’ bedau lama tu tadi, dikena, ku Adenan baru: “Aku udah ngasuh sida bebaik baru. Baka ni ku chara sida mutarka nya, barang ku sida. Penemu sida patut segala lalu anang ngemeratka diri tang parti. Ari nya kitai deka senutuk penemu,” ku iya.
“Aku enda ngarika sapa-sapa, enti nya penyarut ke nyadi dalam komponen parti, aku enda (masuk champur).
“Tang enti laya nya majak, lalu penanggul nya deka ngachau BN, aku enggai enda (masuk champur) laban aku nyadi ketuai BN di Sarawak. Lalu, laya bansa tu ke majak ngachau penuduk BN,” ku iya.
Minggu nyin tadi Wong ba sebengkah atur pengawa lebuh dikerandau bekaul enggau SUPP, iya madah sebengkah atur ke dipinta iya, mulaika diri ngagai parti nya, penuduk di Komiti Kereja Besai parti (CWC) patut ngembuan 50/50 ari sesepiak nyengkaum presiden SUPP Tan Sri Peter Chin Fah Kui enggau iya empu, iya nya 13 ari sepiak Chin lalu 13 agi ari sepiak Wong mangku pengawa dalam CWC.
Ba pekara Parti Tindakan Demokratik (DAP) nengah ‘Projek Impian Sarawak’ ke deka ngerembaika parti nya ngagai menua pesisr, iya madah” “Ambika chunto, enti manuk baru betelu sigi, setengah genturung pendiau nya nemu laban manuk nya ragak empekak tang penyu enti ngeluarka 100 igi telu, enda bemunyi.
Nya ku orang ‘Tokenism’, ku iya lalu nambah, pemansang DAP nya enda ngachau pengawa bepilih ti deka datai ila.
Kemari, PBB ngatur dua bengkah aum, iya nya sepiak pagi, aum pra-kunsil nengeri ke semua Kaban Kunsil Nengeri (ADUN) sereta ngalih hari nya, aum enggau MKT.
Entara pekara ke bisi dipejuraika maya aum nya, bekaul enggau politik, lejislatif enggau gaya politik di menua tu.
Dalam aum nya mega, MKT nuduh ex-ADUN Subis enggau Lambir, Dato Yusuf Sani Wahab nyadi Ketuai Publisiti nganti endur Adenan suba belabuh ari seharitu (kemari) ke nerima sukung ari semua MKT enggau kaban PBB.
Kelimpah ari nya, ba jurai gaya politik di menua tu bekaul enggau DAP ke deka ngerembaika sayap sida iya ngagai menua pesisir berebak enggau krisis benung nyadi dalam SUPP enggau SPDP.