Pengelemi ba penyerakup entara raban bansa tau ngeruga pengelikun sereta ngemuntan pemansang menua
SIBU: Raban bansa Dayak patut ngetanka penyerakup ti nyadi penyanding pengering semua rayat di menua tu.
Kaunsilor Pasang Ngalambai madah, enti raban Dayak kering, kitai ulih nyaup ngemansangka menua tu sebaka enggau pengingin bala ketuai perintah Barisan Nasional (BN).
Ku iya, tiga bengkah bansa ke mayuh di Sarawak iya nya Dayak, China enggau Melayu/Melanau ti nyadi penyanding ke penyerakup di menua tu.
“Enti sema sebengkah ari bansa tu lemi, reti nya lemi mih penyerakup enggau pengelikun ke diasaika semua peranak menua.”
“Ukai reti kami deka ngachau bansa bukai taja pan kami dekaka raban Dayak kering,” ku iya.
Iya bejaku munyi tu lebuh bejadika Pengerami Mantar Gawai Dayak ke diatur Komiti Pengelikun enggau Pemansang Genturung Pendiau (JKKK) Permai Jaya ditu, malam kemari.
Sama bisi ngulu pengerami nya, Chairman JKKK Permai, Jaya Lipo Maieng.
Pasang mega meransang raban Dayak di menua tu ngambika majak meri sukung ngagai ketuai Dayak sereta mega ketuai BN.
Kerejasama ketuai enggau rayat raban Dayak beguna amat ngambika semampai setipak enggau sebarang pemansang ke diatu.
“Aku berasai gaga ati laban semua orang bisi ngulu pengerami malam tu, ulih duduk semija sereta begulai enggau pangan diri.”
“Seiti ari kebuah Hari Gawai diintu, iya nya kena ngempuru semua orang sereta mega sama berami seraya ngedutka kaul enggau pangan diri,” pia ku iya.
Iya mega muji JKKK Permai Jaya laban ke udah mujur ngatur program nya.
Ku iya, JKKK Permai Jaya sebuah serakup ke mit tang mujur ngatur program nya nengah inisiatif kaban serakup nya ke bebida penantai ari serata menua tu.
Ku iya, pengawa ke dikereja JKKK Permai Jaya tu patut nyadika chunto serakup bukai, laban program ke diatur tu ulih negapka penyerakup ditu.