KUCHING: Gempuru Raban Pemerindang sekali agi mujur diatur ungkup taun ketiga lalu nyaup ngerapit kaul entara raban orang ke regas ba pengawa pemerindang di Kuching.
Diatur nengah chara begempung sereta betulung ba atur nyendiaka pemakai enggau utai irup, gempuru taun tu diatur ba sebuah rumah kaban gempung tu di Batu 9 Jalai Penrissen kemari.
Dikemujur Kaban Kunsil Nengeri Lubok Antu Malcom Mussen Lamoh, gempuru nyata meri awak ngagai raban pemerindang begulai sereta bekunsi penemu enggau pangan diri.
Ba jaku ngemujur pengawa, Malcom ngasai raban pemerindang patut temegah ke diri empu ketegal ti udah bejalaika pengawa merindang orang bukai.
Ku iya, nengah kaul enggau gempung ke manah, pengawa sida ke nyadi pemerindang deka mudah dikereja sereta dikerindu semua.
Bela datai ngerami Dekan Fakulti Sains Sosial UNIMAS Prof. Madya Dr Neilson Ila Mersat enggau Sapit Presiden Gerempung Pengansah Seni enggau Main Asal Dayak (PPSKD) Isa Lee.
Pengawa nya mega bela dikemataka temuai ari menua luar iya nya Prof. Dr. Nancy White ari Univerisiti Florida, Amerika enggau Dr. Oliver ari Jerman.
Ngerami gempuru kemari, sekeda raban artis angkat belagu ba panggau ke disedia ke alai sida diiring ‘Band Api’.
Gempuru matak raban artis, komposer, pemuzik Dayak enggau raban Dj ke diau ngelingi Kuching.
Entara sekeda ke datai Gordon John, Along Lupeng, Boi ‘Aka Damba’ enggau Dj Matthew Abu.