KAPIT: Chairman SADIA Pampang Kapit, Edward Manggah Kendawang madah, pemesai Majlis Amanah Rakyat (MARA) ke interbiu nembiak ukai Islam sereta nujuka tanya pasal pekara Islam empai lama ke udah, nya salah sereta enda patut ditandu dudi ila.
Ku iya, ulah ke baka nya enda beradat sereta sebengkah ari kelai deka nyeliahka bansa bukai sereta deka ngirit Islam ngagai palan pelajar tinggi. Ulah ke baka tu bechiping ati sereta enda setipak enggau Rukun Negara sereta Undang- undang Menua Malaysia.
Nitih ripot, dua iku nembiak Dayak peranak asal menua Sarawak ditanya pemesai ari MARA senentang jalai pengarap Islam lebuh ngulu interbiu nya.
Menteri Pemansang Tanah, Tan Sri Dr. James Jemut Masing ringat enggau ulah ke baka nya sereta minta raban bekuasa ngetuka ulah nya enggau jampat.
Edward Manggah bejaku munyi tu enggau pemberita ngenang ripot ti dibantai ba surat kabar bekaul enggau ulah pemesai ari MARA ti bejalaika interbiu betanyaka pekara sentang jalai pengarap Islam ngagai orang ke enda nemu ulu ili ba pengarap nya.
“Kati ku orang ke ukai Islam nemu pekara ti bekaul enggau jalai pengarap nya. Tanya nya enda patut dituju ngagai orang ke ukai Islam laban tebal agi bansa asal di Sarawak tu ukai Islam. Enti nembiak ke ngulu interbiu (lelaki tauka indu ) enda mujur dalam interbiu nya, pemesai ti bejalaika interbiu nya patut diukum,” ku iya.
“Enti dudi ila, interbiu dipejalaika ngagai peranak bansa asal Sarawak, aku arapka pemadu nadai pan seiku ari orang ke interbiu nya enda tau enda bansa asal peranak menua Sarawak, sekalika ari bansa Iban, Bidayuh tauka Orang Ulu (ke ukai Islam)”,tandu iya.
“Aku ke nyadi Chairman SADIA Pampang Kapit, enti sema bisi nembiak ke ngulu interbiu nya ditanya pasal Islam, anang enda madahka kami. Kami deka mai pekara nya ngagai raban bekuasa ke pemadu tinggi. Aku bisi betemu enggau sekeda apai indai, sida ringat amat enggau pekara tu. Sida mega ngaga ripot polis ngambika pemesai nya diukum. Ngagai apai indai, ulah pemesai ti bejalaika interbiu nya bepilih bansa lalu pekara ke baka tu enda patut nyadi di Sarawak,” ku Edward.
Tandu iya, kami di Sarawak tu amat ngemeranka konsep 1Malaysia. Barang sapa ti ngembuan runding bechiping, enda patut datai ke Sarawak. Kepala Menteri, Tan Sri Adenan Satem bisi kuasa nagang orang ke baka tu ngindik kaki ke Sarawak. Penatai sida kitu semina ngemunaska pemanah kaul sereta pemanah basa enggau pangan diri ti udah dikemeranka di Sarawak kenyau ari kelia menya.