Dikarang Judan Bungap //
SONG: Freshley Carlos MacDownson ari Sekolah Kebangsaan (SK) Nanga Embuau nengah lagu ‘Pantun Budi’ mujur manggai ke iya nyadi champian ba ‘Pertandingan Nyanyian Irama Malaysia Sekolah Rendah Peringkat Daerah Song’ ke diatur ba sekula nya kena 16 April tu tadi.
Penuduk lumur dua ba kategori lelaki pulai ngagai Cyprian Alexander ari SK Nanga Nansang enggau lagu ‘Mentera Semerah Padi’ lalu ditangkan John Juanda ari SK Nanga Bangkit ke mai lagu ‘Cek Mek Molek’.
Ba kategori indu, lagu ‘Nirmala’ mujur mai Nuraleya Haryana Yahya ke mega ari SK Nanga Embuau nyadi champian ba kategori nya.
Penuduk lumur dua diempu Tiara Martin ari SK Nanga Musah nengah lagu ‘Joget Berhibur’.
Krisma Rimong ari SK Temalat ke mai lagi ‘Joget Pahang’ teulihka penuduk lumur tiga.
Pekit serak tu digulu 21 iku nembiak sekula primari nyengkaum 11 iku nembiak lelaki enggau 10 iku nembiak indu.
Sekula ke ngambi bagi ba pekit tu iya nya SK Nanga Embuau, SK Nanga Selibut, SK Nanga Beguang, SK Nanga Dalai, SK Nanga Temalat, SK CVS, SK Nanga Nyimoh, SK Nanga Musah, SK Nanga Bangkit, SK Nanga Nansang enggau SK Lubok Bedil.
Maya bejadika pekit tu, pengari Opis Pelajar Pelilih Song Lucy Meling madah, tuju pekit tu diatur laban deka nyungkakka pengelandik nembiak primeri ba pengawa belagu.
“Nengah pekit tu mega kitai ulih neranakka ulah patriotisma ba bala nembiak.
“Kelimpah ari nya, pekit tu sebengkah ari chara kitai nyapai tuju aspirasi enggau tuju Opis Pelajar Malaysia ti deka nempa nembiak ti mujur ba semua pekara,” pia ku iya madah.
Pekit ke diatur sehari nya mega dikena milih nembiak ngarika Opis Pelajar Pelilih Song bepekit ba renggat sitak Kapit enda lama agi.
Bela bisi maya tu iya nya Chairman Serakup Apai Indai enggau Pengajar (PIBG) Lawrence Sikai.