Anda di sini

Tanya ke baka nya nadai pematut sereta nyarutka runding, ku Masing

Advertisement

KUCHING: Menteri Pemansang Tanah Tan Sri James Masing, ngemeratka pekara ti bekaul enggau chalun ukai Islam ke ditanya sentang jalai pengarap Islam lebuh ke diinterviu minta scholarship ari Majlis Amanah Rakyat (Mara).

Ku iya, pekara nya nyadi kena Hari Enam minggu seiti nyin tadi ke alai seiku nembiak, Nigel Unchat Jeremaiah ti teulihka semua ‘A’ ba pemutus peresa,ke masuk ba ‘open question-and-answer session’ bisi negu pasal sabjek jalai pengarap Islam.

Ku Nigel, chalun ditanya penemu sentang pekara ti bekaul enggau Ukum Hudud, ‘rukun Solat’, ‘adat menziarah jenazah’ enggau sekeda tanya bukai. Chalun mega ditanya sentang nama sekeda Nabi Islam.

Maya ke diinterviu nya, sida dibagi ngagai gerup ke alai 10 iku dalam segerup. Interviu nya diatur Maktab Rendah Sains Mara, Semariang. Interviu nya dipejalaika tiga renggat baka berandau daIam gerup, tanya saut enggau atur pengawa dalam gerup.

Iya ke mega ex-nembiak SMK Batu Lintang minta scholarship nengah Kaunsil Wang Turu Peranak Asal (Mara), kena nampung pelajar dalam program Mechanical Engineering ba Kolej Mara Seremban, Negeri Sembilan.

“Sida enda patut nanya tanya ke bekaul enggau jalai pengarap Islam. Salah nanya orang ke ukai Islam sentang tanya ke bekaul enggau jalai pengarap Islam. Nama pematut nya ditanya enti deka minta scholarship nampung pelajar ngagai palan pelajar tinggi ? Sida mega enda tau melabaka chalun nemu nyaut tanya nya.

“Opis Mara patut nemu, mayuh bansa asal di Sarawak ditu lalu semina mimit aja raban Islam ditu. Kati gaya enti chalun enda tesautka tanya nya deh ? Sekalika reti nya iya enda bulih,” pia ku Masing ke mega presiden Parti Rakyat Sarawak (PRS) madah ngagai The Borneo Post lebuh ke enggau betemu ba rumah iya ensanus.

Sama bisi dia maya nya, Nigel enggau indai iya,Sudan Nyanggau.

Masing melabaka orang ti bejalaika interviu nya patut nanya chalun pasal langgur penemu pasal perintah, konsep 1Malaysia  enggau sekeda pekara bukai ke engkeman agi. Orang ke bejalaika interviu nya mega patut nanya tanya ke engkeman agi ari nya.

Ku iya baru, iya melaba tanya ke baka nya ditanya ngambika chalun ukai Islam enda bulih ba peminta scholarship nya.

“Tanya ke baka nya enda engkeman kelebih agi enti orang nya talukka batang pengarap. Semina ketegal menua Malaysia tu menua Islam, ukai reti semua peranak menua tu nemu chara jalai pengarap Islam diajar. Aku enggai meda pekara ke baka tu bisi nyadi baru di Sarawak,” pia ku Masing.

Ku Nigel, seiku ari orang ti bejalaika interviu nya ngampir iya pengudah meda iya enda nyaut tanya nya. Pengudah iya madahka diri Keristin, nya baru orang nya nanya iya penemu pasal Ukum Hudud.

“Dalam gerup kami, bisi seiku chalun indu ke ukai Islam. Kami duai sama betapi enggau penanggul ke sebaka, tang udah nya iya ditanya pasal penanggul sarak enggau ruang bilik.

“Ukai kami enggai masuk ba sessi tanya saut, tang kami enda nemu nyaut nya. Aku irau ati enggaika ketegal kami enda nemu nyaut nya, tau ngujungka kami enda bulih scholarship .”

Ku iya, lebuh ke berandau dalam gerup sereta ngereja pengawa dalam gerup, chalun diuji pengelandik mutarka penanggul enggau IQ. Enti nitihka jaku padah dalam website Mara, chalun ke mujur dalam interviu nya deka nemu pemutus kena 8 Mei.

Nigel anak ketiga ari lima iku diri menyadi. Menyadi bukai ke tuai agi ari iya diatu benung nampung pelajar ba Universiti Malaysia Sabah (UMS) enggau Unimas. Ba peresa SPM taun seiti nyin tadi, Nigel teulihka pemutus 9A ba semua sabjek ke diambi iya.

Advertisement