ENGKILILI: Kaban Kunsil Nengeri (ADUN) Engkilili Dr Johnnical Rayong anak Ngipa ngelalau bala tuai rumah ba kandang menua DUN Engkilili ngembuan sistem bejalaika pengawa ke teatur dikena bejalaika pengawa ba rumah panjai sida.
Ambika chunto, bala tuai rumah patut naruh pom bantu e-kasih tauka pom bantu ari Opis Pengintu Pengelantang Pendiau, ngambi ngemudahka ba rayat ari baruh pegai iya muntang agi ngisi pom bantu nya.
“Nengah chara nya, kita serumah tau enda ibuh nurun ke opis ke bekaul enti sema sida deka ngisi pom, pia ku iya.
Iya bejaku munyi tu ba Pengerami Merarau ke diatur JKKK Rumah Bulie, Lidong Pandak, di Balai Raya Sekim Skrang, apin lama ke udah.
Nengah awak nya, Dr Rayong lalu ngungkupka Projek Mit Pemansang Menua Pesisir (MRP) RM7000 ngagai JKKK RH Bulie lalu RM3000 ungkup Biro Indu sida.
Pengerami nya udah dipenyadika Kaban Parlimen Lubok Antu, William Nyalau anak Badak.
Dr Rayong mega ngelalau peranak rumah panjai begempung ngemajukan rumah panjai sida.
“Ngambika rumah panjai kita maju, kita semua anang enda begempung ngereja pengawa, pia ku iya.
Bela bisi ngulu pengerami nya, SAO Betong Ludan Lintong enggau Pemesai Penerang Parlimen JASA P.203 Lubok Antu, Geoffery Baja anak Ricky Maba.