Anda di sini

SDNU Sibu deka ngangkatka asil pengelandik jari bansa Iban

Advertisement

Dikarang Judan Bungap

 

SIBU: Serakup Dayak Sarawak (SDNU) Pampang Sibu deka begempung enggau Opis Asil Pengelandik Jari Malaysia pampang Sarawak ngangkatka asil pengelandik jari asal bansa Iban ba sitak tu.

Chairman SDNU Pampang Sibu madah, juluk ati nya disempulang enggau tuju nyaup ngerembaika penatai pemisi bansa Iban nengah asil pengelandik jari asal ti nyentuk ke sehari tu bedau tentu nyengala ulih besemekih enggau produk bukai ti dikelakula ba makit dagang.

Maya ke berandau enggau pengarang berita empai lama tu tadi iya madah, mayuh bansa Iban ba rumah panjai ngembuan pengelandik ngaga asil pengelandik jari tang empai tetemuka chara tauka jalai pengelandik nya ulih nyadi sebengkah dagang ti ulih nyungkak penatai pemisi diri.

“Dikena kitai ngemunka tuju tu, SDNU Pampang Sibu deka berunding enggau Opis Asil Pengelandik Jari Malaysia Pampang Sarawak, berandauka chara baka ni kitai ulih ngangkatka ukir kitai Iban”.

“Nya alai, Pekit Ngukir Terabai 2014 ke diatur serakup kami deka dikena ngepunka perambu tu,” pia ku iya.

Iya ke mega Sekretari Politik Kepala Menteri madah, nengah kerejasama tu, bala Iban ti bisi penau ngaga asil pelandik jari ulih diintu Opis Asil Pengelandik Jari Malaysia baikka ba pekara meri elawin ngagai sida ti ulih ngajar orang bukai, dikena ngerandang jalai ngelakuka asil pengelandik jari ngambi ulih manggai ba tikas ti tinggi agi sereta mega pekara bukai ti bekaul.

Nya alai ku Tengku, serakup sida deka mai opis nya milih orang ke patut nyadi champian ba Pekit Ngukir Terabai 2014.

Kelimpah ari nya ku iya, seiti pemujur ke udah dipeda maya hari tu baka pemujur Johnny Berangan ari Rumah Singgai, Pasai Bon, Batu 16 ditu ke udah tebilang nama nyentuk ke menua tasik ba pengawa ngambuh enggau ngaga ilang.

“SDNU Sibu mega deka begulai enggau Johnny mandangka chara ngaga duku, ilang enggau nyabor ngagai raban serakup kami.

“Kitai ngarapka iya mujur ba pengawa ngambuh enggau ngaga ilang begulai enggau SDNU Sibu sereta mega Opis Asil Pengelandik Jari,” pia ku iya madah baru.

Kelimpah ari nya ku iya, serakup sida mega deka begulai enggau Johnny ngiga chara ngemayuhka agi bansa produk ke ulih dibai ngagai makit dagang kelimpah ari ilang tauka nyabur.

Ba tuju ke sebaka, Tengku madahka SDNU Pampang Sibu bisi ati deka begulai enggau Dayak Cultural Foundation (DCF) sereta Tun Jugah Foundation (TJF) ngangkatka asil pengelandik jari Pua Kumbu.

Ku iya, udah datai ba maya iya pengelandik tu diangkat ngagai tikas ti tinggi agi ngambi pulaika penguntung ngagai bala Iban ke bisi pengelandik.

“Mayuh kitai Iban ba rumah panjai landik nenun Pua Kumbu.

“Nya alai, kitai deka begulai enggau DCF sereta TJF ngatur singkang kati asil tu ulih mai penguntung ngagai bansa kitai.

“Tu mega chara ti engkeman kena ngetanka asil pengelandik jari seraya matak pengerindu nembiak rebak baru belajarka chara ngaga asil tu,” pia ku iya.

Dulu agi ari tu, Tengku enggau bala SDNU Pampang Sibu ke bukai bisi nemuai ngagai Johnny, meda iya ngambuh sereta ngaga ilang kelimpah duku ke bukai baka nyabur.

Pengari ari Opis Asil Pengelandik Jari Malaysia Pampang Sarawak Haironi Bohari, bela bisi enggau nemuai sehari nya.

Advertisement