KUCHING: Gerempung Dayak Sarawak (SDNU) ngelalu sereta nyukung penerang ti dipansutka Kepala Menteri Sarawak, Tan Sri Datuk Amar Adenan Satem apin lama ke udah ti minta Kot Tanah dikemetul,lebuh aum Kunsil Nengeri kena bulan November taun seiti nyin tadi.
“Perambu ngemetulka atur nya kelai perintah menua nyukung sereta deka nyaga tanah NCR ari ke dijual beli peranak asal menua tu.
“SDNU muji perintah menua laban udah ngaku adat asal ba pengawa bejual belika tanah NCR,” pia ku Sekretari Besai SDNU, Kilat Beriak kemari.
Ku iya, perambu ngemetulka nya engka nadai agi udah tu ila, kelebih agi pengudah nyadi penyaru enggau penyerekang penemu pasal pengawa bejual beli tanah NCR ke nyadi ba peranak asal menua tu.
Ku Beriak, enti perintah enda mutarka pekara nya, penyaru nya deka nyadika penyipingserta penyarut ba raban bansa asal.
“Enggau tu, SDNU meri terima kasaih ngagai Kepala Menteri laban udah ngaga pemutus deka mutarka penanggul enggau penyaru ba raban bansa asal. Pemutus ke diambi Kepala Menteri enggau raban kabinet ulih negapka agi pengarap ati peranak asal menua tu ba bala ketuai,” pia ku Beriak.
Ku iya, SDNU minta semua peranak asal menua tu meri sukung ke penuh ngagai perambu Kepala Menteri ti deka ngemetulka kod tanah nya.
“SDNU mega meri besai terima kasih ngagai Sapit Kepala Menteri, Datuk Patinggi Tan Sri Alfred Jabu ke udah nyadi ketuai minta kod tanah enggau semua adat asal ke udah kelalu lama nya dikemetulka.
“Kami mega meri terima kasih ngagai bala menteri Dayak baka Menteri Pemansang Tanah, Tan Sri Datuk Amar Dr James Jemut Masing, Menteri Pemansang Rama, Tan Sri William Mawan Ikom, Menteri Kebun Dandang Besai enggau Komoditi,Datuk Amar Douglas Uggah enggau Menteri ba Opis Menteri Besai, Datuk Joseph Entulu sereta bala ketuai raban Dayak baka Tan Sri Datuk Amar Leonard Linggi, Tan Sri Datuk Amar Leo Moggie, Tan Sri Celestine Ujang, Datof Joseph Salang, Datuk Seri Edmund Langgu enggau Datu Nillie Tangai. Enda tinggal mega ngagai bala profesyenal Dayak, bala raban akademik enggau bala ketuai raban bansa ke udah nyukung pengawa ngemetulka kod tanah enggau adat asal ke udah ke lalu lama.
Ku iya baru, SDNU arapka perintah menua bebendar deka ngemetulka Ordinan Adat Asal 1996.
“Udah datai ba maya adat asal nya dikemaru nitihka gaya pengidup bansa asal ke diatu,” pia ku Kilat.