Dikarang Chris Bishop
MANDANGKA PENYIRU: Thomas (duduk kanan) sereta raban PVTMS Biro Landeh, Kota Padawan nemuai seraya ngesah penusah ke nuntung ruang bilik Joachim di Taman Landeh. Bela bisi dipeda dia,Felicia (dipangku indai iya ba tengah) enggau Terin (duduk dua kiba) sereta kaban bukai.
KUCHING: Gerempung Soldadu Veteran Malaysia Nengeri Sarawak (PVTMS) Biro RPR Landeh bedau lama tu tadi ngesah penusah ke nuntung seiku soldadu veteran, Joachim anak Stephen di Genturung Berumah Taman Landeh.
Penemuai nya diuluka Presiden PVTMS Thomas Ling Kui Eng sereta disempulang Ketuai Biro (Landeh) Terin anak Gasing enggau raban bukai.
Joachim, veteran Soldadu Langit Malaysia (TUDM) ditinggalka (midang) seiku anak iya, Patricia Claude anak Joachim ti beumur 12 taun kena ke 13 April 2014 tu tadi pengudah betapi enggau sebengkah sakit ke enda ditemu.
Nambahka agi penusah ke nuntung ruang bilik Joachim, sapit niang Patricia iya nya Felicia Claude bela ngidap sakit ke sama.
Raban PVTMS ke nemuai bisi seraya nyuaka bantu ngagai ruang bilik Joachim.
Ba kaul bukai, PVTMS Biro Landeh mega bisi ngusung sereta ngesah pemedis ke ditapi seiku veteran soldadu, Bujang anak Jambol ti udah seminggu diperubat di Sepital Besai Sarawak (SGH) kena ke 25 April tu tadi.
Penemuai nya diuluka Mandal Ketuai Palan Servis PVTMS Pelilih Kuching Nelson Hanif Abdullah sereta disempulang Terin enggau raban bukai.