KUCHING: Raban ketuai nembiak redak kemari, ngansak Pampang Indu Parti Demokratik Progressif Sarawak (SPDP) matak pulai pemutus sida ti deka ngenuku undi enda pechaya ngagai Presiden Tan Sri William Mawan Ikom.
Sapit Chairman SPDP Muara Tuang, Tuai Rumah David Jiku Nader madah, pemutus pampang Indu parti nya enda manah laban tuju Mawan deka bebaik enggau raban empat iku ketuai ke udah ditingkilka suba sereta semina nerima sida baru nyadi kaban aja.
“Atur bebaik nya pengawa ti chukup manah sereta senutuk enggau penyerakup ke digenggam dalam Barisan Nasional (BN). Pengawa bebaik nya mega seiti ari strategi ngulihka pemujur ungkup BN ba pengawa bepilih nengeri ke dudi tu ila.
“Tang ke pemadu beguna iya nya, semua empat iti penuduk ke dikuasa sida empat nya endang 100 peratus ungkup SPDP,”pia ku Jiku ke mega seiku Kaunsilor Samarahan.
“Enti sida empat enda diterima masuk parti, penuduk mengkang ungkup SPDP, tang enti sida empat nyadi kaban dalam parti, nadai seiku tau betalatka sapa ngempu empat penuduk nya, tandu iya.
“Atur tu mega deka mai reti Tan Sri Mawan enda kediri agi ngarika parti maya Aum Kunsil Nengeri (DUN) ke berengkah Hari Satu (5 Mei) tu, ku iya..
Diatu, Mawan ke nyadi ADUN Pakan kediri aja ngarika parti, ke alai empat iku ketuai nya mengkang ngatika diri pengudah ditingkilka ari SPDP belabuh ari bulan November 2011 nyentuk ke Januari 2012.
Empat iku ADUN ke diperambu diterima baru ngagai parti iya nya, Datuk Peter Nansian Ngusie (Tasik Biru), Datuk Sylvester Entrie Muran (Marudi), Rosey Yunus (Bekenu) enggau Paulus Palu Gumbang (Batu Danau).
Paulus mangku pengawa nyadi Direktor sebuah kompeni perintah (GLC) lalu tiga iku ke bukai nya mangku pengawa nyadi Menteri Muda.
Seiku agi ketuai nembiak redak iya nya Tukang Wang SPDP Tasik Biru, Gines Ruwia madah pampang Indu patut nemu pangka ke deka ditapi enti seraban nya ngenukuka pemutus enda pechaya ngagai Mawan ke mega Menteri Pemansang Rama sereta Mandal Chairman Barisan Nasional (BN).
Iya madah pemutus nya tau endar mechahka parti lalu mega tau ngujungka parti dikinsil.
“Nadai utai manah deka ayan ari pemutus enda pechayaka presiden. Aku ukai semina ngelalau pampang Indu tang mega bela ngelalau raban bukai ti nguji deka ngaga pekara ke enda ngena,”ku Gines seraya ngansak pampang Indu matak pemutus sida enggau lengkas.
Kededua Jiku enggau Gines madah, seduai ngasaika diri patut bejaku enti presiden enggau pemaik parti dikeruga orang dalam.
Seduai nimbal penerang ari seiku ari pampang Indu ti mantaika agenda pampang nyan ngagai The Borneo Post Hari Tiga tu tadi.
Bela dikejaku dalam blog iya nya kena ke 25 April tu tadi, Ketuai Pampang Indu Datuk Chiew Yen Chew bisi ngulu sebengkah aum, lalu entara agenda ti dibaumka iya nya deka ngalahka presiden.
Ba Hari ke sama enggau palan ke sama, Pampang Nembiak mega bisi ngatur aum tang semina 8 ari 25 iku exco ke bisi datai. Enda ditemu sekalika aum nya bejuraika agenda deka ngalahka presiden tauka bisi pekara bukai.
Pengamat iya, sekeda raban dalam kededua pampang nya nguji deka ngenuku resolusyen enggai nerima semua empat ketuai (G4) masuk baru dalam parti nya.