Dikarang Rengenyan Labang
AMBIKA PENGINGAT: Shabery (tiga kanan) sereta Mat Isa (dua kanan) begambar bebala mayuh enggau maskot spiderman, berindik ari filem The Amazing Spider-Man 2 ti keterubah dipandang ngagai mensia mayuh berebak enggau pengawa bejadika LFSC di The Summer Mall, Kota Samarahan.
KOTA SAMARAHAN: Pengaya enggau pemanah rampa menua Sarawak ba jalai pengidup enggau rayat patut dikerembaika ngagai raban pengemeran industri ngaga filem enggau drama di menua tasik.
Menteri Komunikasi enggau Multimedia Datuk Seri Ahmad Shabery Cheek madah, nya ukai semina nguntungka pengemeran industri ngaga filem enggau drama menua ari tasik aja, tang ulih nyungkak ekonomi menua sereta ngangkatka industri nya di menua tu.
Nya alai ku iya, perintah nengah opis menteri pemadah ke suba tang diatu Opis Menteri Komunikasi enggau multimedia seruran ngemendarka mayuh agi lagu sereta berita ari Sarawak enggau Sabah ngambika dipandang sereta ditaburka ba program Radio Televisyen Malaysia (RTM).
“Aku suah nangkan sereta mesan Finas ngambi ngayan tauka nabur mayuh agi pasal menua Sarawak enggau Sabah.
“Pengemeran industri ngaga filem enggau drama menua (Malaysia) tu empu patut milih sereta matak pengaga filem tauka drama ari menua tasik ngambika datai ngaga filem di menua Sarawak.
“Sarawak palan ti manah sereta entara pemadu manah di dunya, ukai semina ngembuan pemanah rampa menua aja tang semua orang (Sarawak) pan manah memagang sereta tinggi basa. Tu meh meri pengaya enggau pengelebih ngagai menua ti benama Malaysia,” pia ku iya.
Shabery bejaku munyi tu lebuh bejadika Lotus Five Star Cinema (LFSC) ba The Summer Mall, Kota Samarahan ditu kena malam Hari Tiga, apin lama.
Lebuh ke ngenang sentang LFSC di Kota Samarahan, iya madahka Lotus Group ngeluarka puku urung RM25 juta ke disikap enggau teknologi ke pemadu baru sereta bisi 12 iti skrin.
Lotus Group bisi 126 iti panggung wayang, 118 iti skrin enggau 21,700 iti endur duduk di serata menua tu, ti patut dipuji sereta dikemegah, pia ku iya.
Ku baru iya, panggung wayang (LFSC) ke dibuka ba Kota Samarahan nya nyadi pengelebih ngagai menua kelebih agi ngagai peranak menua tu empu ngambika muka mayuh agi panggung wayang.
Pemayuh panggung wayang di menua tu ulih mantu ngemansangka industri ngaga filem enggau drama, ku iya.
“Ba kami perintah, tu ukai semina pengelebih ke menua Sarawak sereta Kota Samarahan aja, tang aku ngasaika tu meri peluang muka mayuh agi panggung wayang enti deka ngemansangka industri ngaga filem,” pia ku iya.
Malam bejadika LFSC nya, Shabery begulai enggau mensia mayuh meda filem The Amazing Spider-Man 2.
Bela bisi ngulu pengerami nya, Chairman Lotus Grout ti mega kala nyadi Menteri Besai Perlis, Datuk Seri Dr. Mat Isa Sabu, Direktor Besai Summer Mall, Datuk Lee Chee Fui, Chairman Perbadanan Kemajuan filem Nasional Malaysia (FINAS) Datuk Mohd Affendi Hamdan enggau bala bukai.