Dikarang Rengenyan Labang
KUCHING: Pemesai enggau kaban Parti Sa’ati Rayat Sarawak (SUPP) patut nitihka atur sereta meri kerejasama ngagai Kepala Menteri Tan Sri Datuk Amar Adenan Satem, ti minta sida ngetu charut tang patut seati sereta segulai sejalai kena ngenegapka parti komponen Barisan Nasional (BN).
Kebuah pia ku Sapit Menteri Dalam Nengeri, Datuk Dr. Wan Junaidi Tuanku Jaafar, Opis Menteri Dalam Nengeri enggau Opis Pengerejista Gerempung (ROS) mutus agi ngetanka SUPP.
“Aku minta pemesai enggau kaban SUPP meri kerejasana ngagai Kepala Menteri (Tan Sri Datuk Amar Adenan Satem), ti dekaka semua penyarut enggau penyerekang penemu nya diputarka enggau manah lalu beserakup ke penegap BN sereta patut ngatur aum besai nitihka ti udah ditimpuhka parti nya empu.
“Pemutus tu digaga pengudah diperati nitihka undang-undang sereta dipansik ngena chara profesyenal, udah diperunding enggau Kepala Menteri sereta bisi pemendar ari Menteri Besai (Datuk Seri Najib Tun Razak). Nya meh chara ti pemadu manah kena mutarka parti nya.
“Diatu semina bepanggai ba pemesai SUPP nya empu,” ku iya lebuh ditanya raban pengarang berita ba sebengkah pengerami di Bako ditu kemari.
Wan Junaidi arapka parti SUPP diatu udah nyendiaka diri begulai sejalai sereta seati kena napi pengawa bepilih besai nengeri ke deka datai tu ila.
Kelimpah ari nya, lebuh ti dipinta ngenang pekara bukai ke bekaul enggau pengawa begempuru bebala mayuh di Kuala Lumpur ti enda setuju enggau penumbuh Chukai Barang enggau Servis (GST) , Wan Junaidi madahka raban ke ngatur enggau orang ke ngulu gempuru nya enda nitihka atur ke patut.
Ku iya, penegap undang-undang bekaul enggau gempuru bebala mayuh nengah chara likun nya enda nyekat raban ke deka ngatur gempuru nya, tang pengelantang enggau pengelikun orang ti enda masuk gempuru nya patut dikemerat.
“Penegap undang-undang bekaul enggau pengawa begempuru bebala mayuh nengah chara ke likun nya meri peluang ngagai orang ke deka ngatur nya, tang sida patut beratka pengelantang, pengelikun enggau hak orang bukai ke enda masuk gempuru.
“Tang maya ke begempuru nya kemari (ensanus di Kuala Lumpur) orang ti enda enggau gempuru nya enda dikemeratka, laban atur pengawa begempuru nya ngasuh jalai sekut sereta ngenusahka orang ti bejalai kaki enggau ti bekena ke kereta.
“Pelaba aku, pengawa begempuru bebala mayuh nya diatur laban sida bedau meretika pemanah GST,” ku iya.
Bepelasarka riput berita, orang ti ngulu gempuru bebala mayuh ke mantah GST nya begempuru ba lima bengkah alai di Indu Menua (Kuala Lumpur), lalu sekeda nya enda nitihka atur dalam Akta Perhimpunan Aman (APA) 2012.