Anda di sini

Wong: Jaku bansa bukai baka Bahasa Melayu bisi bagi ba pemansang menua

Advertisement

BAHASA KEBANGSAAN UKAI HAK EKSKLUSIF ORANG MELAYU AJA: Wong (tiga kanan) begambar begulai enggau raban nembiak ti bulih champian, SM Jalai Riam Miri sereta pengajar sida iya.

KUCHING: Bahasa Melayu ukai semina dikena orang Melayu aja, pia mega jaku bansa bukai bisi bagi dalam pemansang menua.

Menteri Opis Kandang Menua enggau Pemansang Komuniti, Dato Sri Wong Soon Koh madah, rayat Malaysia patut ngangkatka Bahasa Kebangsaan lalu semua orang ke ukai Melayu diperansang ngena Bahasa Melayu enggau naka ulih.

“Pemujur nembiak sekula ke ukai Melayu ke ngelui nembiak Melayu dalam sabjek Bahasa Melayu mandangka sida iya enggau naka ulih belajar Bahasa Kebangsaan nya.

“Pengelandik nembiak sekula sekondari Cina ke ngatika diri ngena Bahasa Kebangsaan berat lalu patut digaga nyadi chunto, beratika jaku tu nyadi jaku menua (Bahasa Rasmi) ke udah lama dikena di menua tu, nyadi jaku (komunikasi) sereta penyerakup menua,” ku Wong.

Iya madah munyi nya ba atur pengawa Nutup Pekit Forum Nembiak Sekula 2014 Renggat Menua Sarawak (Sekula Sekondari China Peribit Nengeri Sarawak) ti diatur Dewan Bahasa dan Pustaka pampang Sarawak (DBP) enggau Gerempung Lembaga Pengurusan Sekolah China Sarawak begulai enggau Opis Pelajar Menua (JPS) di Balai Budaya, DBP ditu, kemari.

Iya madah, pengelandik bejaku dalam mayuh macham bansa jaku kelimpah ari jaku diri, nembiak ngelala mayuh macham bansa adat pesaka pangan diri ke datai ari mayuh macham pupu bansa ke sama diau dalam menua tu.

“Nengah chara nya, ngelala adat pesaka bansa bukai deka ngajar kitai bebasaka pangan diri lebih agi rayat Malaysia ke datai ari mayuh macham pupu bansa,” ku iya.

Iya nandu baru, Perintah udah ngaga sistem transformasyen pelajar kena beratika kualiti dalam tiap pengawa sereta japai atur ke setipak enggau atur Perintah Besai, lebih agi bekaul enggau sistem sekula.

“Kena ngamatka tuju nya, Perintah udah ngemansangka Perambu Pemansang Pelajar Malaysia (2013-2023), iya nya perambu ke silik ke pemansang sereta nyadi sistem pelajar Malaysia datai ke jemah ila.

“Perambu nya nyengkaum perambu ke ulih negapka penuduk sekula Cina ngatika diri sereta ngena chara baru ke ulih dikena dalam pemansang sistem pelajar menua. Berindik ari nya, peluang pelajar ti disediaka Perintah patut dikena rebak anak bansa,” ku iya.

Iya madah pekit forum bansa tu muka peluang sereta ngenataika pengerindu nembiak rindu belajar Bahasa Kebangsaan sereta ulih ngena jaku nya enggau manah, enda ngira bansa, pengarap sereta penatai seiku-seiku.

Pekit Forum Nembiak Sekula udah masuk taun ke-21 ke renggat Sarawak taun tu. Dalam timpuh nya, program tu nyadi palan ke manah kena nembiak sekula Sekondari China ke ngatika diri ngelatih pengelandik sida iya ngena jaku Bahasa Melayu enggau Baku.

Ba pekit nya, urung semilan buah sekula China Peribit bisi enggau pekit tu, iya nya Sekolah Menengah (SM) Chung Hua No:1 Kuching, SM Chung Hua No:3 Kuching, SM Chung Hua No:4 Kuching, SM Min Lit Batu Kawa Kuching, SM Catholic High Sibu, SM Ming Lik Sarikei, SM Kai Dee Bintulu, SM Pei Min Miri enggau SM Jalai Riam Miri.

Champian pekit nya kemari, SM Jalai Riam Miri, lalu ditangkan enggau SM Catholic High Sibu (lumur dua) enggau SM Chung Hua No:1 Kuching lalu chairman ke pengabis nyulut dimenang ulih Keith Lian Robert, lalu ditangkan enggau pemforum ke pengabis nyulut, Chong Yun Yee.

Sebedau nya, Direktor Opis Pembinaan Bahasa dan Sastera (DBP Malaysia) ngarika Kepala Direktor DBP Malaysia, Rusli Abd Ghani madah pemujur nembiak ukai Melayu ngelui nembiak Melayu dalam ngena jaku Bahasa Kebangsaan ti diperatika majak nambah ninting taun, mandangka Bahasa Kebangsaan nya ukai hak eksklusif orang Melayu aja.

Sama bisi ngulu atur pengawa nya kemari, Sapit Chairman Lembaga Pengelola SM Chung Hua No: 1, 3 & 4 Pemancha Ko Wai Neng, Pemangku Direktor DBP pampang Sarawak Dr Hazami Jahari enggau Ketuai Unit, Unit Kokurikulum JPS Abit Hong.

Advertisement