KUCHING: Program kimpin meri darah sebengkah chara Raban Soldadu Malaysia (ATM) nempa penyiru soldadu rebak baru beratka pemesai reti nampung seput orang lebuh maya begunaka darah.
Panglima Briged Ketiga Infantri Malaysia, Brigedier Jeneral Datuk Mohd Nazir Mami madah, dibandingka enggau kelia orang rebak baru diatu enda mudah ngetaika diri empu meri darah ngagai Bank Darah.
Nya alai ku iya ulah nyaup orang bukai ke begunaka darah endang ditempa dalam raban soldadu lebih agi soldadu ke biak.
“Kelimpah ari ngisi Bank Darah ngambi seruran chukup, tuju kimpin tu mega ulih meransang raban soldadu tauka rebak baru ngembuan penyiru deka mantu orang ti begunaka darah.
“Kelia enti diberut meri darah, orang ngenataika diri empu lalu enda ibuh nganti diasuh, diatu bisi tusah mimit lalu nya meh ari kebuah sida Bank Darah selalu kurang bekal darah.
“Kitai engka enda meda nama asil ari utai ke dikereja (meri darah), tang kebendar nengah darah ke diberi kitai nya dipelabaka ulih nyelamat nyawa orang bukai,” ku iya lebuh dikerandau pengarang berita.
Nazir mansutka pekara nya lebuh ti datai ngagai atur pengawa meri darah nyerumba Hari Ulang Tahun Tentera Darat Ke-81 Peringkat Wilayah Timur kandang Kuching ti diatur ba Dewan Bukavu, Kem Penrissen, Batu 8 ditu, pagi kemari.
Nazir ti datai ba pengerami nya ngarika Panglima Pemerintahan Timur, Leftenan Jeneral Datuk Mohd Zaki Mokhtar.
Nitihku iya pengawa meri darah sebengkah atur ti enda tau enda dipejalaika raban ATM maya bisi pengerami besai kelimpah bisi diatur begulai enggau polis enggau kebukai nengah Bank Darah ti mindah kin kitu sereta peminta bekal darah ngenyit ari sepital.
“Dalam setaun pengawa meri darah ti enda kala tinggal diatur iya nya maya pengerami nyambut Hari Divisyen, Hari Tentera Darat, Hari ATM enggau Hari Briged.
“Meri darah tu endang program ti enda tau enda diatur dalam pengerami nya sereta ngarapka dudi hari ila deka terus dipejalaika.
“Tambah mega diatu kitai selalu ninga berita penusah bebadi ba jalai alun selalu nyadi sereta begunaka darah, nya alai kitai ngasaika program ti baka tu (meri darah) endang patut dikena mantu orang ti begunaka darah,” ku iya.
Kelimpah ari nya iya madahka taun nyin kemari ba atur pengawa meri darah nyerumba Ulang Tahun Tentera Darat Ke-80 sida tegumpulka 230 pain darah.
Maya kimpin meri darah nyerumba Ulang Tahun Tentera Darat ke-81 kemari, raban soldadu tu tegumpulka 199 pain darah.