Anda di sini

Ugak udah mujur ngatur penemuai gawa seraya ngayanka penyiru

Advertisement

KAPIT: Kaban Parlimen (MP) Ulu Rajang, Wilson Ugak Kumbong mujur ngatur penemuai gawa seraya ngayanka penyiru ngagai peranak menua ba sitak Belaga enggau Palan Pengentap Baru Sungai Asap.

Penemuai iya disempulang Sekretari Politik Kepala Menteri Sarawak, Angeline Umis Tujok, bala ketuai raban bansa baka Pengulu Bunsu, Tuai Rumah Emak, Tuai Rumah Ajai, Pemancha Tony Kuleh, Pemancha Umeh, Pemancha Ajang Sirek, Pengulu Bunsu, Kaunsilor Bete Lahang, Kaunsilor Nelson Bakat Gira enggau bala penyukung BN ari Baleh enggau Belaga.

Lebuh nemuai nya, keterubah endar Ugak ngabas nembiak Primari Enam ke dituntung penusah angus beberapa hari ke udah, ari ke nyadi ba Palan Pengentap Baru  ba Skim Palan Pengentap Baru Bansa Penan di Tegulang. Berebak enggau nya iya lalu nyuaka pemeri ari Kelab ‘Barisan Nasional Back Bencher ‘(BNBBC) RM 10,000 sereta ari iya empu RM 2,000. Bisi empat pintu rumah kayu udah  angus ba penusah nya, lalu Ugak besemaya mantu sida ngaga rumah baru enggau naka penyampat.

Ari Tegulang, Ugak enggau raban iya lalu neruska pejalai ngagai Tekat Ai Murum ke tebilang endur bejalaika pansik kena nyendiaka perambu numbuhka Tekat Ai Baleh. Iya disempulang bala ketuai ari Baleh baka Pengulu Bunsu, Tuai Rumah Ajai, Tuai Rumah Emak,  Tuai Rumah Palong enggau Ketuai Pemadah PRS  Pelilih Baleh, Johnny Osman. Lebuh ti nemua kia, sida lalu diberi penerang ke pemadu baru senentang maya Tekat Ai Baleh nya deka digaga.

Pagi hari kedua, Ugak bejadika Aum Serakup Apai Indai enggau Pengajar, disempulang pengawa nyuaka perais ba SMK Belaga. Nangkanka nya, iya mega bisi nyuaka chek RM5,000 ngagai PIBG SMK Belaga ngambika bisi dikena sida bejalaika atur pengawa sepemanjai taun.

Ba pengerami nya, iya  muji bala pengajar laban  udah bejalaika pengawa enggau manah sereta  nempa nembiak ke nyulut ba pelajar ari menua pesisir, baka ari SMK Belaga.

Iya mega meransang bala pengajar regas sereta ngajar ngena chara baru, setipak enggau Polisi Pelajar Menua Malaysia.

Udah nya, iya lalu diberi basa nyuaka perais ngagai bala nembiak ti nyulut ba peresa PMR, SPM enggau STPM, sereta nyuaka Netbook 1Malaysia ngagai bala nembiak ari SMK Belaga.

Tembu atur pengawa di SMK Belaga, Ugak  ngagai Uma Kahei dalam pejalai nuju Highway Café, ngabas rumah panjai baru sida dia. Nengah awak nya iya lalu ngungkupka belanja Projek Mit Pemansang Menua Pesisir  (MRP) RM 20,000 ngambika bisi dikena sida bebelika kereban dikena berumah.

Berebak enggau nya, iya lalu ngemendarka peminta ngaga lurung bejalai kaki nuju rumah panjai, atap enggau pagar dikena ngaga Dewan Mayuhguna Mini di Uma Kahei, ke mega beserimbai enggau penemuai Menteri Pemansang Tanah, Tan Sri Datuk Amar Dr James Masing enggau raban iya ke nemuai seraya gawa ngagai Uma Kahei.

Ba hari ke penudi, Ugak bejadika ‘Koperasi Keluarga Let Belaga’ ba Highway café  di Jalai Bakun Belaga.

Lebuh bejaku, Ugak muji pengawa ti dikereja Koperasi Keluarga ti mandangka raban bansa Orang Ulu mega sama dekaka pemujur ba pengawa dagang, ngambika setipak enggau bansa bukai nengah chara nguna peluang ari penegap enggau pemansang ekonomi menua Malaysia, kenyau udah merintah diri ari baruh pegai perintah Barisan Nasional.

Lemai nya, Ugak enggau raban iya ngelawa Uma Kejaman Lasah di Long Segaham Belaga. Di iya bejadika sebengkah pengerami ti diatur Opis Kaunsil Pelilih Mit Kapit (MDK).

Beserimai enggau nya, iya ngungkupka geran MRP RM20,000 ngagai JKKK Kejaman Lasah, ngambika bisi dikena sida ngatur pengawa semanjai taun.

Advertisement