Anda di sini

Timpuh nganjung asil pekit Ngukir Terabai dilanjar ngagai 25 Mei

Advertisement

SIBU: Gerempung Bansa Dayak Sarawak (SDNU) Pampang Sibu ngelanjarka timpuh ari 13 Mei ngagai 25 Mei 2014 hari penudi endur mensia mayuh ke deka masuk Pekit Ngukir Terabai 2014 nganjung asil ukir sida.

Chairman SDNU Pampang Sibu Tengku Gruna madah, timpuh tu diubah dikena meri awak ngagai bala pemekit nembuka terabai sida.

“Kitai udah ngaga pemutus ngelanjarka timpuh tu laban bisi bala pemekit madah ngena awak ke lama nembuka terabai sida,” pia ku iya madah ngagai pengarang berita, kemari.

Iya madah, naka ke diatu pekit nya nerima sambut ke manah ari mensia mayuh.

“Kelimpah pemekit ari Sibu pekit tu mega nerima sambut ari menua bukai lalu ke diatu lebih 10 iku udah nganjung nama,” ku iya madahka baru.

Tengku mega madah, terabai nya ila deka dipandang maya Pengerami Ngiling Bidai Renggat Sibu ke diperambu deka diatur kena 14 Jun lalu dipenyadi Sapit Kepala Menteri Tan Sri Datuk Patinggi Alfred Jabu Numpang.

Terabai ke digaga enggau pekit tu meseti lima kaki peninggi lalu pemesai iya nitihka peneka diri empu.

Ukir meseti dipat lalu dilinsu kelimpah ukir nama diri empu enggau leka jaku SDNU Pampang Sibu 2014 ba belakang terabai.

Puin deka diberi nitihka pemanah ukir (50 persin), pemanah chura (20 persin), penegap terabai tauka bansa kayu (15 persin) enggau pengalus ukir tauka pemanah paras terabai (15 persin).

Champian ba pekit tu deka mai pulai perais mata duit RM700 sereta disempulang enggau trupi.

Penuduk lumur dua ngagai lumur tiga mai perais mata duit RM550 enggau RM400 lalu bela disempulang enggau trupi.

Kelimpah ari nya, tujuh iku pemekit ke bukai deka nerima perais sagu ati mata duit RM300 tiap seiku.

Penerang silik bekaul enggau pekit tu tau ditanya ngagai Chairman Komiti Pekit Barieng Balai nengah lumur 013-8107234 tauka Sambang Jalak (019-8546435) enggau Simon Amud (019-8585221).

Advertisement