UNDANG KAMI: Adenan nerima surat undang nyereta SUKMA Ke-17, Perlis ari Azlan di Wisma Bapa Malaysia kemari. Bela dipeda Mawan (dua kiba).
KUCHING: Tuai Rumah Sukan Malaysia ti Ke-17, Nengeri Perlis sedia nerima penatai semua kontinjen bepekit ba main enggau lumba nya ti disadang berengkah ari 24 Mei nyentuk 4 Jun 2014.
Menteri Besai (MB) Perlis, Azlan Man madah, maya manggai ba maya nya ila, semua palan endur ngatur main enggau lumba SUKMA deka tembu digaga.
“Diatu, tiap palan endur ngatur lumba enggau main udah sedia. Semina empat palan aja mengkang digaga diatu lalu kitai nyadang pengawa nya deka tembu ba pengujung bulan April tu.
“Empat palan ke benung digaga iya nya, balai badminton, Skuash, palan aquatik enggau padang golf. Kunteriktor nyamin semua empat palan nya deka tembu ba pengujung bulan tu,’ku iya.
Iya mansutka penerang tu ngagai pemberita pengudah nemuai ngenataika surat undang ngagai Kepala Menteri Tan Sri Adenan Satem, perintah nengeri sereta kontinjen Sarawak di Wisma Bapa Malaysia Petra Jaya ditu, kemari.
Penemuai Azlan bela disempulang sekeda raban exco Perlis lalu bela digulu Menteri Pemansang Rama Tan Sri William Mawan enggau Menteri Muda Lumba enggau Main Datuk Dr Lee Kim Shin.
Azlan nambah, urung 9,500 iku orang ke nyengkaum raban atlit, raban teknikal sereta volunteer ari sereta nengeri deka begempuru ba mayuh bengkah palan di Perlis dalam timpuh dua minggu SUKMA diatur.
Ngenang senentang penemuai sida seraban, Azlan madah penemuai nyadi siti pekara tradisional ke patut diadu tiap tuai rumah SUKMA kenyau dipun ba taun 1986.
“Penemuai ngenataika surat undang rasmi ngagai tiap nengeri sigi pekara ti dikemeran kenyau SUKMA dipungkal.
“Aku ngarika Nengeri Perlis nampung pengawa tu,”ku iya.
Kelimpah ari nya, Azlan mega madah SUKMA ukai semina deka ngiga atlit baru ke chakah tang mega deka negapka penyerakup rayat Malaysia ti diarika bemacham bansa sereta jalai pengarap.
Ba kaul ke sama, Mawan ti nimbal jaku undang ari Perlis madah siti pengerami ngintu Hari Gawai deka diadu di Perlis rambau SUKMA nya ila.
“Ketegal main nya diadu maya kitai Dayak di Sarawak ngintu Hari Gawai, raban kontinjen ari Sarawak deka dinah ba siti pengerami Gawai di Perlis kena 1 Jun.
“Kitai mega ngundang tuai rumah SUKMA ke 17, Perlis datai berami ke alai kontinjen ari nengeri bukai mega bela diundang,”ku iya.
SUKMA Ke-17 nyendiakka 396 midul emas, 396 midul perak sereta 473 midul engkeraju diperebut semua atlit.
Sarawak disadang nyadi tuai rumah SUKMA Ke-18 ba taun 2016.