KUCHING: Bisi 46 iku indu bajik udah ngerejista diri masuk pekit ‘Dayung Sangon’ ti diatur Serakup Bansa Dayak Bidayuh (DBNA), ke ditutup kena 14 April tu tadi.
Sekeda penyereta bisi datai ari Semenanjung Malaysia enggau Sabah, kelimpah ari peranak menua tu empu.
Renggat keterubah endur milih penyereta nya diatur kena 26 April, pukul 9 pagi ba Eastern Mall Supermarket Siburan.
Ari nya tadi, semina 12 iku aja dipilih berebutka gelar nya ke deka diatur kena 10 Mei ba indu opis DBNA ditu.
Champian pekit nya deka nerima perais RM3,000, lumur dua RM2,000 lalu lumur tiga nerima perais RM1, 000, kelimpah ari trofi.
Semilan iti perais sagu ati RM200 mega bisi disediaka. Pekit indu bajik nya keterubah diatur DBNA beserimbai enggau pengerami Gawai Dayak taun tu. Ku presiden DBNA, Datu Ik Pahon Joyik ke mega seiku ari penyanding penemu pekit nya, sida bisi perambu deka ngatur pekit nya ninting taun.
“Tu sebagi ari atur pengawa main asal bansa Bidayuh. Nya alai kami berasai gagit deka ngatur pekit tu ninting taun,” ku Ik Pahon bejaku ba aum enggau pemberita kena Hari Empat tu tadi.
Aum enggau pengarang berita nya mega diatur seraya nerima pemeri ari Nestle Products Sdn Bhd, ke melanja pekit nya.
Ku iya, pekit nya ulih ngempuruka mayuh bengkah entik Bidayuh ari Biatah, Selako, Bau enggau Serian.
Ku Ik Pahon, pekit nya beguna amat endur nempa pengarap enggau pengering ati ba bala penyereta seraya nyeliahka asai pengurang diri.
“Ba tikas umur, (penyereta beumur ari 18 nyentuk ke 28 taun), sida patut nyulut ba pekara akademik enggau sekeda pekara bukai, nya alai pekit beguna amat nyadika pelasar endur nempa pemaik enggau pengering ati sida ngambika ulih nyadi pengari bansa Bidayuh,” ku Ik Pahon, ke mega Sekretari Mendam ba Opis Menteri Dagang Temuai.
Beserimbai enggau nya, tikit makai lemai maya pekit final nya dijual berega RM1, 000, RM850, RM500 enggau RM300 semija sereta bisi dijual ba indu opis DBNA .
Sapit Menteri Pengeraja Asal enggau Rampa Menua, Datuk Seri Dr James Dawos enggau Menteri Pemansang Perengkaguna sereta Komunikasyen, Dato Sri Michael Manyin deka ngulu pengerami nya ila.
Sama bisi ngulu aum enggau pemberita nya Temenggung Austin Dimin Niyon, ke mega seiku ari penyanding penemu pekit nya enggau Chairman pengatur pekit, presiden Biperoh Dr Benedict Poris.