KUCHING: Tiga puluh enam iku pengaji di nengeri tu ditemu ngelanggar polisi gaji pemadu mit ti udah dipejalai ba pun taun tu tadi.
Pekara tu dipansut Unit Penerit Adat ari Opis Pengereja Pengawa (Labour) Sarawak nengah siti surat penerang, nimbal tanya ke udah dulu dikenatai.
“Sigi amat, kitai udah nerima 30 iti riput nyentuk ke diatu ba taun 2014 ke bekaul enggau polisi gaji pemadu mit lalu penyampau semua raban pengaji ti ngelanggar polisi tu manggai ngagai 36 iku,”ku isi surat penerang nya.
Pengudah nerima riput, unit penerit adat deka bejalaika pansik enggau tuju nentuka penulin kes.
“Udah nya kitai deka nganjung surat bebasaka polisi ngagai pengaji enti sida bisi ngelanggar Perintah Gaji Pemadu Mit 2012.”
Unit deka meri pengaji timpuh 14 hari berengkah nitihka polisi ti udah ditetap. Pengaji mega dipinta mayar laluh gaji (arrears) ngagai orang makai gaji ti enda nerima bayar ke patut.
Nitihka penerang ari Opis Pengereja Pengawa, tebal agi riput dituju ngagai bengkah pengawa ti meri servis.
Opis nya mega besemaya deka ransing agi matau pejalai polisi gaji pemadu mit ke nyengkaum ba kedai kupi.
Nengah pengawa matau, pemesai deka bejalaika pansik lalu nentu sekalika pengaji bisi ngelanggar undang-undang pengereja pengawa nyengkaum Perintah Gaji Pemadu Mit.
“Maya bejalaika pengawa matau, kami deka nanya semua pengereja pengawa sereta meresa gaji ke diterima sida, lalu pia mega meresa rikut pengaji.”
Naka 31 March 2014, Opis pengereja Pengawa Sarawak ngerijista 61,308 pengaji di serata Sarawak.
Sebarang sebana tauka riput tau dikenatai ngagai indu opis nengah lumur 082-254281 tauka nuju email: [email protected] tauka nuju opis pengereja pengawa tiap pelilih menua iya nya nengah lumur 082-247349 (Kuching), 082-616073 (Kota Samarahan), 082-875842 (Serian), 083-325114 (Sri Aman), 083-471501 (Betong), 083-438603 (Saratok), 084-654013 (Sarikei), 084-330702 (Sibu), 084-796114 (Kapit), 084-874179 (Mukah), 086-316810 (Bintulu), 019-859 5286 (Bakun), 085-425114 (Miri), 085-755967 (Marudi), 085-215113 (Limbang) sereta 085-285452 (Lawas).
Inisiatif Gaji Pemadu Mit Menua dituku Menteri Besai Datuk Seri Najib Tun Razak ba jaku bajet iya ba taun 2010.
Polisi Gaji Pemadu Mit chukup beguna ngagai pengereja pengawa kena nentuka sida ulih nempuh kus pengidup ke majak nambah.
Berengkah ari 1 Januari tu tadi, Opis pengereja Pengawa ba serata menua udah diperintah neritka Polisi Gaji Pemadu Mit 2012, ke alai sida mega diansak matau semua raban pengaji ngambika polisi dititih sereta dikemerat.