NGABAS TIKAS PEMANSANG: Masing, Alexander, Ugak enggau sekeda bala ketuai ari opis perintah ngabas palan penyangkai perau ke benung digaga diatu.
KAPIT: Menteri Pemansang Tanah Sarawak, Tan Sri Datuk Amar Dr James Jemut Masing madah,penyikap perengkaguna ba palan penyangkai perau panjai beguna amat ke orang ti bekenaka perau di Kapit.
“Enti perengkaguna ba palan penyangkai perau nya udah tembu digaga, nya beguna amat ke orang ti bekenaka perau ditu. Sida deka bisi palan kediri endur ngengkah sereta nanchangka perau enggau setur endur naruh injin sepit. Penyampau suwa nya deka ditetapka SRB (Kaunsil Sungai Sarawak ) ila”, pia ku Masing sepengudah ngabas tikas pemansang pengawa ngaga penyikap perengkaguna nya ba pasar Baru, lemai ensanus.
Ku iya, penyikap nya beguna amat dalam kandang beberapa taun ke dudi tu ila, laban mayuh orang ti bekenaka perau panjai ditu. Sida begunaka palan ti manah agi endur nanchang perau sereta naruh injin sepit.
“Aku berasai gaga ati meda tikas pemansang nya baka ke dipadahka JKR (Opis Kereja Raya) ti disadang tembu digaga dalam kandang tengah bulan Jun, beberapa minggu sebedau timpuh ti ditetapka. Bulan Jun, nya maya ngintu Gawai Dayak, ke alai perengkaguna tu beguna amat ”, pia ku iya.
“Aku udah ngasuh Majlis Daerah Kapit (MDS), minta tanah (tanah galau perintah) ke besepiak enggau palan penyangkai perau panjai nya ngagai perintah menua, ngambika bisi alai ngaga palan endur ngengkahka kerita sereta mega markit endur bejualka asil ari kampung ”, pia ku iya.
Aidyl Engineering Sdn Bhd, kontrektor ti dikearapka ngaga palan penyikap ke beungkus RM 4,855,539 berengkah ari 11 March 2013 nyentuk ke 10 Jun 2014 (limabelas bulan).
Dulu ari nya, Masing, Sapit Menteri Pemansang Menua Pesisir enggau Kandang Menua, Datuk Alexander Nanta Linggi enggau Kaban Parlimen Ulu Rajang, Wilson Ugak Kumbong udah mendingka penerang sentang tikas pemansang projek nya, matau sereta merambu projek di Kapit nengah Atur Pemansang Malaysia Lumpar ke-10 ba bilik konfren Majlis Daerah Kapit (MDS).
Sama bisi ngulu aum nya, Kaban Parlimen Ulu Rajang, Wilson Ugak Kumbong, Residen Kapit, Fedrick John George, Sekreteri Politik Kepala Menteri Sarawak, Wilson Nyabong Ijang enggau Jefferson Jamit Unyat, Tuai Opis Kaunsil Mit Pelilih Kapit, Philimon Nuing, DO Kapit, Elvis Didit, bala pemesai ari Opis Kereja Raya ari Pelilih Tengah, Sekreteri Opis Pelilih Mit Kapit, Yong Ing Chu enggau sekeda ketuai opis perintah enggau ketuai raban bansa ti betuaika Temenggung Dato Seri Tan Kian Ho.