SKRANG: Kaban Kunsil Nengeri (ADUN) Engkilili, Dr Johnnical Rayong Ngipa ngelalau rayat di nengeri tu lebih agi menua pesisir, anang pechayaka petenah seraban orang ti madahka perintah ngerampas tanah NCR sida sebedau tu.
Petenah nya kena nyaru runding rayat ti semina deka nguntungka orang nya aja, pia ku iya.
Dr Rayong mega ngelalau rayat di DUN Engkilili ngambika begempung enggau Opis Tanah enggau Survei (JTS) Bagi Menua Sri Aman, lebuh JTS nyukat tanah sida nengah Program Primeter Survei ila.
Ku iya, mayuh penguntung enti tanah rayat udah disukat nyengkaum mudah ngulihka bantu betanam betupi ari perintah.
“Enti sema udah disukat, rayat ulih ngemansangka tanah sida enggau mayuh macham utai tanam nengah chara dagang sereta mega mudah ngulihka bantu ari ijinsi perintah ke bekaul,” ku iya.
Iya bejaku munyi tu lebuh bejadika Pengerami Nyuaka Surat Ngenukuka Tanah nengah Seksyen 6 Atur Tanah Nengeri ke diatur JTS Sri Aman di Balai Raya Sekim, Skrang, kilah ensana.
Kelimpah ari nya, Dr Rayong mega minta JTS nyukat tanah rayat ba sitak DUN iya enggau lengkas.
“Aku pengari rayat DUN Engkilili minta JTS jampat agi nyukat tanah rayat ke bedau disukat nengah primeter survei,” pia ku iya.
Berebak enggau nya, lapan buah kandang menua ke ngembuan status tanah NCR ti mungkur pemesai 4,879 ke diempu peranak ari 19 buah rumah panjai di Skrang, Engkilili udah dituku nyadi tanah Rizab Komunal Bumiputera, nengah Atur Tanah Nengeri.
Sama bisi ngulu pengerami nya, SAO Opis Pelilih Mit Lubok Antu, Ignatius Ayai Dom @ John, Pemantu Kanan JASA DUN Engkilili, Edwin Anceh enggau bala ketuai raban bansa ditu.