KUCHING: ‘Persidangan Kebangsaan Pengurusan Pedidikan Pengetua Sekolah Malaysia’ ke-53 (PPPSM) udah mutuska dua pekara besai ke patut dikemeratka.
Yang Dipertua (YDP) Kepala Pengajar Sekula Malaysia (MPSM) Muhamad Khailani Abdul Jalil madah aum sekali tu netapka dua pekara besai, netapka Perambu Pemansang Pelajar (PPP) ulih ditegutka nyengkaum perambu ke ulih dikena dalam timpuh ke panjai.
“Tu reti nya kami beratika atur ke patut dititih lalu dikena dalam kelas laban kelas tu penentu pemujur ngagai PPP.
“Enti sekula enda mujur ngaga nya, Opis Menteri Pelajar pan enda mujur. Sekula pekara ke berat,” ku Muhamad Khailani.
Iya madah munyi tu lebuh dikerandau sepengudah Nutup Aum Kebangsaan PPPSM ke-53 ti ditutup ulih Sapit Kepala Direktor Pelajar Malaysia (pampang Operasi Pelajar) Dato Sufaat Tumin di hotel Riverside Majestic ditu, kemari.
Dalam aum empat hari nya, raban kepala pengajar sereta opis pelajar ke dalam 527 penyerta ari serata menua, baum mansutka tujuh resolusyen alai semua ‘resolusyen’ ke digaga nya kena ngemanahka agi operasi di sekula.
Resolusyen ti dibacha Sekretari MPSM Asiah Husin, minta nambah ungkup kena ngaduka sekula (PCG utai ke dipelajar, ukai utai ke dipelajar, buding enggau sekeda utai bukai) ulih digaga enggau jampat ngambika ulih kena beratika transformesyen pekara bekait enggau pelajar ulih digaga; semua sekula sekondari dilis nyadi Sekula Gred A aja; Nikika Elawin Tanggung Pengawa Kepala Pengajar ari RM150 ngagai RM600; Nambah penyampau pangku pengawa Kepala JUSA C ari 20 ngagai 40 lalu ngisi pengawa puang tu enggau jampat; Meri kuasa autonomi ngagai Kepala Pengajar ngambika ulih ngadu atur Opis Menteri Pelajar Malaysia (KPM) nitihka kreativiti enggau inovsi lalu berundingka pengulih sekula; Nembiak ke nurun sekula lebih ari 85% aja dikemendar ngambi peresa nyadi chalun sekula; Kolej Vokasional patut nyendiaka kos pengelandik ke nembiak ke enda teulihka gred manah.
“Semua resolusyen ke digaga kami nya kena ngemanahka agi atur sereta perengka guna operasyen kelimpah ari kami mega beratika peniki elawin kepala pengajar ke udah lama enda dipansik, kebuah kami nandu pekara elawin kepala pengajar ke ngelamatu dibayar RM150 aja.
“Kami pan enda minta mayuh, semina nambah aja,” ku iya.
Ba pekara resolusyen ke minta 85% aja nembiak sekula dikemendar ngambi peresa nyadi chalun sekula, iya madah diatu, gred sekula digaga ulih EPRD lalu kelai ke besai, iya nya lebuh semua gred, semua kategori nya sebaka magang.
“Keterubah, ngaga gred sekula tu utai ke lama, laban bisi sekeda sekula udah berubah laban gred nya nitihka pemayuh nembiak dalam sekula nya.
“Reti nya, enti penyampau nya udah berubah, kami begunaka siti proses ngaga gred baru. Sekula gred A, ngaul penyampau elawin ngagai ketuai bidang. Gred B, penyampau elawin ngagai ketuai-bidang dalam RM60 enda ulih dibayar laban gred tu dichiri ari dalam.
“Nya alai kami minta ngambika atur tu ulih digaga di semua sekula ngena gred ke sebaka enggau semua ketuai bidang diberi penambah elawin,” ku iya.
Ba atur 85% nembiak ke tau nyadi chalun sekula maya peresa ku iya, atur ke diatu ku iya, semua nembiak ke udah ngerijista ngambi peresa di pun taun (enti nitih ninting bulan Mac), semua chalun ke beperesa nya chalun sekula, enda ngira nembiak nya nurun sekula tauka enda tang kadang-kadang sekeda nembiak lama enda besekula tang semina datai ngambi peresa aja, laban nya hak iya.
“Nya alai, kami minta atur baru ngagai ‘Lembaga Peperiksaan’’ tu baka chunto, peresa SPM, semina penatai tauka nurung ngagai kelas nya chukup nitihka atur baru tau beperesa…Baka di universiti.
“Enti enda chukup, tau ngambi peresa tang nyadi chalun luar ukai chalun sekula,” ku iya.
Kelimpah ari nya, Muhamad Khailani madah dalam meri kuasa autonomi ngagai kepala pengajar, reti nya kepala pengajar diberi mandat ngaga atur, netapka kemisi sekula (ambika chunto) laban baka ke diatu iya ditetapka KPM.
“Autonomi kuasa tu semina kena kepala pengajar ngemujurka atur pejalai sekula.
Autonomi mega ari pengawa nyaga sekula nya dalam konteks semua taja pan udah bisi tang enda entu tegut endar,” ku iya lalu nambah autonomi tu permbu keterubah iya deka dibantai ngagai KPM.