MENGKANG NGARAP: Rumah Jan masih mengkang ngarapka raban nya ngaga projek mini hidro ba kandang menua Ulu Tau, Anap.
Peranak minta dikesinu dibekal karan 24 jam, perambu projek nya udah dipesetuju semina nganti projek nyadi aja
TATAU: Peranak rumah panjai ba kandang Ulu Tau, Anap ditu minta raban ke bekaul jampat agi ngaga projek mini hidro ba kandang menua sida.
Ku seiku peranak menua nya, Tuai Rumah Jan Jelian, sida ditating ungkus belanja ke besai laban meli minyak diesel ti dikena injin api, ngambika bisi karan ninting hari.
“Penanggul besai kami ditu, nadai karan tang bisi injin api ke semina dikena maya malam hari aja laban ke deka ngelimat ungkus minyak diesel.
“Enti sema dipasang sepemanjai hari ngelama 24 jam dalam kandang 30 hari, tentu ungkus nya besai. Taja pan semina dipasang muak ke malam aja, tang kami tetap berasai ditating ungkus minyak ke mar, kelebih agi baka kami ke jauh ba menua pesisir,” ku iya madah ngagai Utusan Borneo, empai lama ke udah.
Ku iya, nyauka semua sida serumah bisi injin api ngemansutka belanja enda kurang ari RM300 sebulan kena meli minyak diesel.
“Udah ga menua kami jauh di ulu entigis, rega minyak mar ketegal dibansi enggau rega ungkus perengka pengangkut. Segilin minyak diesel dijual RM10 enda umbas dikena sehari. Bisi sekeda meli setung besai, nya baru chukup dikena sebulan.
“Rega setung besai nya RM300 nyentuk ke RM400. Enti nadai penatai penatai pemisi ke tetap, dini deka ngiga duit ngemayuh nya,” pia ku iya.
Ku Jan, dalam taun 2010 bisi seraban orang datai kia madahka perambu deka ngaga projek mini hidro ngambika peranak rumah panjai di Ulu Tau, Anap bisi kuasa karan.
Ku iya, perambu projek nya udah dipesetuju lalu kandang menua endur bejalaika projek nya udah disukat, semina nganti projek nya dipejalaika aja.
“Projek mini hidro kami nya deka digaga ba Wong Separai di Nanga Tau. Ku raban nya, projek nya ila deka meri pengelantang ngagai semilan buah rumah panjai ba kandang menua Ulu Tau.
“Dipelabaka lebih ari 200 iku peranak menua nya deka ngasaika pengelantang ari projek nya. Taja pia, nyentuk ke diatu, udah empat taun projek nya diperambu, tang lalu nadai bisi kelai projek nya deka digaga. Nya alai, kami ditu ngansak raban nya jampat agi ngaga projek mini hidro ba kandang menua kami ditu.
“Lama agi kami nganti, majak berasai kami ngenatka tating belanja ungkup minyak injin api. Enti projek nya udah digaga, kami ulih ngena karan ke enda bebayar,” pia ku iya.
Seiku agi peranak menua nya, Kam Balang minta pengasih ari wakil rayat sitak nya ngambi berundingka sida di Ulu Tau.
Ku iya, pekara ke beguna amat iya nya, pemansut kuasa karan tauka projek mini hidro ti udah dipesetuju sereta disemayaka suba.
“Udah empat taun disemaya, tang kami agi ngarapka ari projek nya. Kami mengkang ditating ungkus meli minyak injin api.
“Ukai semina nya aja, tambang pulai mansang ari tu ke pasar Tatau, RM60 seiku nepan kerita suwa 4WD. Tambah mega, kami apin temu selamat laban ke nengah jalai lori kayu batang sekalika maya kemarau tauka ujan.
“Kami beterima kasih laban ke bisi jalai luri kayu ti, ngemudahka pejalai kami. Taja pia, kami ditu betapi enggau ungkus pengidup ke besai nyengkaum minyak diesel ungkup injin api kami, tambang ke pekan, barang ke dijual, penanggul telekomunikasi ti enda ngemuaska ati enggau sekeda penanggul bukai.
“Enti ulih penanggul nadai karan nya diputarka dulu, laban mar kami deka beridup enti nadai kuasa karan. Semua begunaka karan enti dibanding enggau penanggul bukai ti tau tinggal dulu,” pia ku iya.
Taja pia, Jan enggau Kam madahka diri berasai gaga ati enggau gaya pengidup di Ulu Tau, Anap ke mayuh udah berubah enti dibanding enggau ke suba, sekumbang ari baruh pegai perintah Barisan Nasional (BN), taja pan jauh di ulu entigis.
“Taja pan mayuh udah berubah, tang kami amat begunaka karan. Kami udah bisi ai paip enggau jalai, tang kami begunaka karan laban ti enda tan agi ditating ungkus meli minyak diesel ti dikena injin api kami.
“Kami mengkang ngarapka raban nya tauka perintah ulih ngenerangka kandang menua di Ulu Tau, Anap ngambi pulaika pengelantang ngagai kami semua, sereta mega anak uchu kami ti ngarapka pemansang ari perintah BN belama,” pia ku seduai.