SRI AMAN: Bala nembiak diperansang regas dalam aktiviti ko-kurikulum ke sama pemesai guna enggau akademik.
Kaban Parlimen Sri Aman, Masir Kujat madahka, bala nembiak endang diperansang chakah belajar ngambika nyulut dalam pelajar, tang sida mega enda tau enda regas dalam bidang ko-kurikulum baka ti udah ditetapka sekula.
“Pelajar penentu pengidup nembiak dudi ila, tang sida enda tau enda regas dalam ko-kurikulum masuk ba aktiviti lumba enggau main tauka gerempung,” pia ku iya.
“Nadai chara mudah enti deka mujur kelimpah agi chakah belama dalam kededua bidang nya ngambika juluk ati sida,sekula enggau sida sebilik ulih dijapai.”
Iya bejaku munyi tu lebuh ngelancharka Program Milih Atlet, Sekula Sekondari (SMK) Melugu ba padang sekula nya ditu ensanus.
Ku iya, polisi pelajar menua endang tampak endar dipeda deka nyungkak pengelandik enggau pemandai nembiak.
“Tiap buah sekula di menua tu endang ngembuan pengingin deka nempa nembiak ke pandai sereta ngembuan ulah enggau pemai diri ke manah, ngambi pulai ngagai pemanah sida empu sereta mega pulaika pengelantang mensia mayuh ke bukai,” ku iya.
Ku iya baru, ngambika setipak enggau polisi pelajar menua, perintah deka meda bala nembiak nampung pelajar nyentuk ke tikas universiti, sereta bulih pengawa ke manah udah nya ila.
“Enti sema deka nampung pelajar ngagai tikas pemadu tinggi, bala nembiak ukai semina enda tau enda nyulut dalam akademik aja, tang pemujur sida dalam bidang ko-kurikulum mega deka diguna,” ku iya.
Bela bisi ngulu program nya, Prinsipal SMK Melugu, Jamit Ajok, Pemesai Khas Masir, Edmund Pirang enggau bala pengajar bukai.
Beserimbai enggau program nya, Masir ngungkupka belanja RM5,000 ngagai Serakup Apai Indai enggau Pengajar (PIBG) sekula nya ngambika bisi dikena belajaika aktiviti di sekula nya.