KUCHING: Polis agi nganti pemutus peresa buntastasat Sepital Besai Sarawak (HUS) kebuah anak mit ke berumur 6 taun, di Simunjan parai ke dipelaba kena penyati.
Kepala Polis Menua Datuk Mohd Sabtu Osman madahka, saspek, iya nya apai tuai anak mit nya ke berumur, 46 taun lalu gawa di sebuah sekula di Simunjan, teparuk dalam kes tu diatu udah kena riman 7 hari belabuh ari hari iya ditangkap, ngambika ulih ditasat enggau silik agi.
Anak mit nya dipelaba kena penyati berindik ari ditemu bisi bakal ba pemalu enggau jari iya, disah parai maya datai di Sepital Simunjan, kena Hari Empat tu tadi.
“Tu ukai pengawa mensia ke meruan runding. Anti dulu pemutus buntastasat sepital baru kitai nemu enti saspek maya nyamah nya laban bisi udah makai dadah tauka enda gerai untak.
“Pemutus pansik buntastasat bedau diterima ke dijangka digaga sehari tu (kemari)…Kami agi nganti. Tang, dijamin undang-undang deka meri ukum nitihka pematut ngagai orang ke ngereja pengawa salah nya,” ku Mohd Sabtu madah maya dikerandau sepengudah bejadika Hari Terbuka Raban Gerakan Udara (PGU) Polis Diraja Malaysia di Padang Merdeka ditu, kemari.
Ari tasat sebedau nya, nembiak mit nya ke diau enggau aya enggau ibu iya, di Kampung Sageng lalu besekula di kelas pra sekula di Sekolah Kebangsaan (SK) Sageng ditemu balat bakal ba pemalu kelimpah ari bisi ditemu bekau kena gigit di jari iya.
Anak mit nya enda diau enggau indai iya empu laban ke gawa sereta diau di Serian, enda jauh ari tu.
Kes tu diatu benung ditasat di baruh Seksyen 302 Kanun Keseksaan.
Ba atur pengawa nya kemari, Mohd Sabtu ditanya pasal ‘luri antu’ ke enda belisin sereta seruran berangkutka kayu ari sitak Bakun ngujungka mensia mayuh ke diau di sitak nya suah endar bebadi.
Iya madah, enti sida ke mai luri tauka bisi ‘orang’ ke ngasuh ngambi kayu dia ke enda nitihka atur undang-undang, sereta ngerusakka perengkaguna dia, polis deka ngambi atur ke terit .
“Kami deka bejuraika pasal pekara tu lalu ngasuh sida ke ngachau sereta ngerusakka perengka guna dia, badu agi ngereja pengawa nya. Polis deka nasat pekara tu, lalu polis mega benung merati pekara nya.
“Enti orang-orang tu enda ngasi, kami ngambi atur undang- undang,” ku iya.
Penanggul bansa tu kala dibantai ulih Menteri Pemansang Tanah, Tan Sri James Masing, ke udah meda gaya jalai nya empu sereta penanggul ke ditapi ulih mensia mayuh ke diau di sitak nya ke enda berani ngerara ‘luri antu’ ke kuang kuit masuk ke dalam sitak nya.
Masing madahka Jalai Bakun nya digaga ke mensia mayuh ke diau di sitak nya, nyengkaum genturung pendiau baru Sg Asap enggau pemansang tekat ai kuasa Bakun-Hidro, lalu ukai digaga ungkup luri kayu.
“Bulan March taun tu, aku beratika luri-luri tu ke tama kia, nyau baka sida ke bempu kuasa. Nyauka tiap-tiap minit bisi luri. Dalam kandang berapa taun tu ke udah, sekeda ari orang mayuh ke diau di sitak tu parai laban bebadi ketegal nyeliah luri tauka kena lubang jalai ke bebesai.
“Enti pekara tu enda dikemutar enggau manah, aku enda tekenyit ninga berita ila, orang ditu deka ngambi atur kediri empu,” ku iya, lalu nambah kompeni kayu bekenaka jalai ke digaga ke orang ke diau di sitak nya enggau pechuma, ngiga pengeraja kediri empu.
Masing madahka opis kandang menua ke bekuasa dalam pekara tu patut beratika penanggul tu, lalu ukai semina ngudahka utai aja, tang beratika penanggul tu enggau berat , ku iya.