SARATOK: Niang Datuk Amar Dunstan Endawie udah nadai maya umur 78 taun di Sepital Saratok kena Hari Lima tu tadi nya seiku tuai Dayak ti dipebasaka kenyau ari menua Malaysia ditumbuhka.
Kaban Kunsil Nengeri sitak Krian, Ali Biju ke bisi datai meri basa ke penudi endar seraya ngenataika penyinu ati ngagai sida niang sebilik di Letong Sawa ensana , madahka niang Endawie tu ` hall mark of Sarawak’ kenyau ari menua tu ngatika diri dalam taun 1963.
“ Iya seiku ketuai Dayak ti dipebasaka sereta mar deka disilih. Pemidang iya pengerugi besai ke komuniti Dayak,” ku iya.
Maya ke agi nyadi orang politik, niang Endawie kala dipadu mangku pengawa nyadi Sapit Kepala Menteri sereta amat dipebasaka bala pangan enggau lawan, laban ari segi politik iya endang manah enggau kededua piak raban politik, sekalika nya enggau bala ari Sarawak empu tauka Malaysia, pia ku Ali.
Nitihka penerang autobiografi ti dipansutka sida niang sebilik, niang Endawie belabuh gawa nyadi pengajar.
Iya ngajar ba St. Augustine junior Secondary School berengkah ari taun 1956 nyentuk ke taun 1957 lalu nangkanka nya ngajar ba St. James School, Bangkit Spaoh.
Udah nya, iya lalu masuk ba pengawa betanam betupi ke alai iya dipaduka nyadi Kaunsilor ba Kaunsil Pelilih Mit Kalaka.
Lebuh ke mangku pengawa nya, iya dikearap nyadi chairman tauka penyanding penemu kaunsilor ungkup Bagi Menua Kedua di Sarawak (Diatu Bagi Menua Betong enggau Sri Aman) Pengawa politik iya berangkah dalam taun 1963, pengudah iya menang ba pengawa bepilihka pangku Kaunsilor ba Pelilih Mit Kalaka .
Iya lalu dichiri nyadi chairman Kaunsil ke mega Kaban Kunsil Nengeri Sarawak.
Dalam taun ke sama mega, iya lalu masuk Sarawak National Party (SNAP) ti betuaika Datuk Stephen Kalong Ningkan, sereta lalu dipilih nyadi kaban Kunsil Besai parti nya.
Keterubah endar SNAP numbuhka kabinet dalam taun 1963, iya dipilih nyadi Menteri Kandang Nengeri nyentuk ke taun 1966.
Dalam taun 1975, iya lalu nyadi ketuai SNAP mangku pengawa nyadi Presiden nyilih Ningkan sereta berunding numbuhka perintah begempung enggau parti bukai nyengkaum PBB ti betuaika Tun Abdul Rahman Yaakub.
Lebuh perintah champur nya mujur ditumbuhka dalam taun 1976 betuaika Tun Rahman, niang dichiri nyadi Menteri Kandang Nengeri, ke alai enda lama udah nya iya lalu dipadu nyadi Sapit Kepala Menteri.
Ketegal pemanah pengawa ti dikereja iya ba nengeri tu enggau menua Malaysia, iya diberi gelar Panglima Negara Bintang Sarawak (PNBS) ke mai gelar `Datuk’ dalam taun 1965 enggau Bintang Kenyalang (DA) ke mai gelar `Datuk Amar’ dalam taun 1977.