Anda di sini

Unit Amanah Pelaburan Satok deka dipungkal PBB pampang Satok

Advertisement

KUCHING: Parti Pesaka Bumiputera Bersatu (PBB) Satok deka numbuhka Perbadanan Pelaburan Satok ke lalu nyendiaka unit Amanah Pelaburan Satok ungkup peranak bumiputera di kandang endur nya.

Kaban Kunsil Nengeri (ADUN) Datuk Amar Abang Johari Tun Openg madahka penumbuh Perbadanan Pelaburan nya  dikena nyaga tauka ngibun reta tanah enggi bumiputera lebih agi di kandang DUN Satok kelimpah meransang raban bansa meranakka puku tauka besimpanka belanja.

“Tebal agi peranak di kandang Satok tu raban bansa bumiputera Islam lalu sida bisi tanah ditu, tang ketegal bebagika reta pesaka nitihka ‘faraid’ pengudah orang ke bempu mati, tanah nya nyadi barang dagang laban bumiputera enda tebeli laban  kelalu mar.

“Nya alai, nengah badan amanah tu, kitai deka meli iya lalu nyema ke peturun ti deka meli baru reta tanah nya dia kitai deka nyual nya baru ngagai sida,” ku iya maya baum pengarang berita sebedau Aum Betambit Pintu Exco PBB Satok di Pejabat PBB Satok ditu malam kemari.

Menteri Pengawa Berumah enggau Menteri Dagang Temuai nya madahka, gempung nya deka dipenyadika Kepala Menteri Tan Sri Datuk Amar Adenan Satem, maya ke deka dipadahka ila.

Abang Johari madahka Gempung nya deka bechairmanka Tan Sri Datuk Amar Abdul Aziz Hussain ti kala nyadi Sekretari Perintah Nengeri.

Ku iya, dikena ngepunka tu sepenyampau RM2 juta belanja udah diungkupka ke tuju nya lalu iya melabaka belanja bisi nambah ngagai RM5 juta manggai taun 2015.

“Tuju kami numbuhka unit beranakka puku tu mega dikena meri awak ngagai kitai ngambi bagi dalam pemansang di kandang menua Satok tu lebih agi reta tanah, ngagai sida ke deka meranakka puku, nya dijual ngena rega RM1 seunit,” ku iya seraya madahka perbadanan nya ngambi model baka Permodalan Nasional Berhad (PNB).

Ngenang pekara bukai, Abang Johari madahka, piak iya diatu benung nempa kerejasama enggau Dewan Bandaraya Kuching Utara (DBKU) ba pengawa ngemanahka lampu jalai di kandang menua nya (Satok).

“Kami deka nganti lampu jalai lama ngagai lampu LED ke terang agi sereta tau meri pengelantang enggau nambah pemanah biu rampa menua Satok,” ku iya.

Projek nya dipejalaika DBKU, ti berengkah dipejalaika tengan bulan April ngagai ujung bulan Mei ila.

Advertisement