KUCHING: Mensia mayuh tauka kitai ke nyadi orang bebelika barang patut nemu ikas belanja diri lalu enda sengapa bebelika barang enti deka nyeliah diri napi pangka tating pengidup ke majak niki, ku mandal presiden Serakup Suara Penguna Sarawak (COVAS), Philip Ng.
Nitihka penerang ari Philip, ruang bilik ke kurang sereta jelan penatai pemisi patut berundingka chara bukai dikena nambah pemisi lalu anang sengapa bejaika perintah kelebih agi ba senentang isu rega barang enggau servis ke udah majak nambah.
“Nyalahka perintah tauka ejensi ke megai kuasa enda sekali mutarka isu tu. Chara nya enda mutarka penusah.
“Pemadu manah mutarka isu tu iya nya kitai empu. Kitai patut nerima sereta napi kus idup ti majak nambah ke alai pekara tu deka seruran nyadi lalu sigi enda ulih diseliah.
“Enti kitai enda sedia lalu enda berundingka chara bukai, kitai deka pedis,” ku iya lebuh dikerandau pemberita kemari rambau ‘Roadshow’ begulai enggau Opis Menteri Dagang dalam Menua enggau Pekara Bebeli Barang (KPDNKK) di Emart Matang ditu.
Iya nambah, pekara ke berat maya kitai ngatur belanja iya nya nemu mida ni bagi barang ti amat diguna enggau ke enda.
Ku iya, pemadu manah endur kitai ngelimat belanja iya nya semina meli barang ke amat diguna sebedau berunding deka meli utai bukai.
Kelimpah ari nya, Philip mega ngansak orang belika barang berunding panjai sebedau ngambi lun ba bank tauka maya bekenaka kad kredit.
“Kitai patut enda nginjau kelalu mayuh kelebih agi ba kad kredit, lun bank sereta anang mega kelalu bebelika perengka lekterik tauka jemari nengah chara bayar pupuk.
“Chara tu tau ngujungka kitai nadai duit agi ungkup belanja ninting hari. kitai patut nyimpan sekeda duit dikena napi sebarang penusah ngenyit,” ku iya.
Ungkup orang ti ngembuan gaji RM3,000 sebulan, penyampau utang ke dibayar sida ninting bulan patut enda ngelui 50 persen ari gaji nya. Pemadu manah ba ikas 30 persen, tandu iya.