KUCHING: Taja pan udah genap sebulan bilun Malaysia Airlines (MAS) MH370 lebang, Tuai Tumah Catherine Tamoh meruan arapka anak tuai iya Andrew Nari ke nyadi ketuai kelasi biliun nya pulai ngagai ruang bilik sida enggau meruan.
Nitihku iya, sida sebilik ngarapka bisi ajih nyadi ngambika semua orang dalam bilun nya meruan magang.
“Kami ngarapka sida agi meruan ba endur bukai laban naka ke diatu nadai penerang ke tegap ngayanka bilun nya deka ditemu (di Lautan Hindi).
“Minta Tuhan ngayanka apak bilun sereta semua krew enggau penumpang ngagai raban penyelamat,” ku iya lebuh ditelefon Utusan Borneo, kemari.
Nitihku Catherine, iya baru pulai ari Sungai Aup tiga hari ti udah pengudah di Kuala Lumpur enggau bini Andrew sereta anak iya nganti berita pemadu baru pasal pengelebang bilun nya.
Ku iya, sida sebilik deka terus liat ati betapi enggau penanggul jemah ila lalu ngelempaika semua pekara nya ba jari Tuhan.
Seagi bangkai bilun nya enda ditemu ku iya, sida nganggap Andrew agi idup lalu pulai enggau selamat.
“Kami enda ngetu besampi sereta arap seagi bilun nya empai temu,” ku iya enggau ati sinu.
Andrew, 49, anak tuai ari empat iku diri menyadi gawa enggau MAS nyadi kelasi bilun ari taun 1989, ti bebini ke seiku pramugari.
Bini iya ngetu gawa pengudah bisi dua iku anak ke diatu udah beumur 18 taun enggau 14 taun. Sida diau ba Puchong Kuala Lumpur.
Bilun MH370 nya mai 239 iku penumpang enggau kelasi bilun MAS berangkat ari KLIA ke Beijing pukul 12.41 pagi 8 Mac tu tadi tang lebang nyentuk diatu.