Anda di sini

TR Adin arapka peminta lun rumah dikemendar

Advertisement

Sida serumah bepanggai ba piak ti bekuasa ngemendarka peminta lun nya enggau jampat

SIBU: Tuai Rumah Adin Jawa bepanggai ba opis ti bekaul berundingka peminta sida serumah ti deka ngelun rumah panjai baru berindik ari rumah panjai sida di Sungai Engkalat ke angus empai lama ke udah.

Maya berandau enggau pengarang berita, iya madah, pekara nya udah dibai Pemancha Stanley Geramong ke mega sama sida serumah ti bela dituntung penusah angus nya ngagai Opis Pelilih Sibu kilah ensana.

“Peminta deka ngelun tu udah dibai ngagai opis ti bekaul lalu kami serumah ke ditinggang penusah angus tu bepanggai ba opis ti bekaul berundingka peminta ngelun rumah panjai baru,” ku iya, kemari.

Adin mega andal ati madah, nyema peminta nya dikemendarka ila, sida deka ngentak ba tembawai angus baru.

Nambahka nya ku iya, Residen Sibu Sim Kok Kee enggau Sapit Chairman Opis Kunsil Sibu (SMC) Andrew Wong udah berandau enggau sida serumah madahka deka minta Opis Kereja Raya (JKR) datai nyungkur tembawai sida ngambika lantang alai ngentak rumah panjai baru.

Skim Lun Rumah Panjai natak nyali RM10,000 sepintu ungkus kereban dikena ngentak rumah panjai baru nengah piak konteriktor ari Opis Menteri Pengawa Berumah.

Nyema mujur bulih lun tu, tiap pintu bilik dipinta mayar RM65 sebulan pengelama 25 taun.

Berebak enggau tu mega Adin ngenang pendiau sida serumah naka ke diatu bisi sekeda ari sida diau ba setor tauka ba pelabuh ke enda abis angus tang ditangkir baru ngena sing.

“Bisi mega ke nadai endur bemalam nyuwa ba pasar Sungai Merah kelimpah ari sekeda diau ba rumah kaban belayan,” ku iya.

Sekumbang ke ditinggang penusah angus tu, ku Adin, sida serumah nerima mayuh macham bantu nyengkaum mata duit ari mensia mayuh, opis perintah, gerempung enggau pengari rayat.

Dulu ari nya Serakup Ex-Soldadu Malaysia (PBTM) pampang Nangka datai nyuaka bantu mata duit ngagai Adin.

Pengawa nya betuaika chairman serakup tu Abang Mos Abang Tunggal.

Kelimpah ari nya, dua iku ex-soldadu ti mega raban PBTM pampang Nangka ti bela ditinggang penusah angus nya deka nerima bantu ari Indu Opis PBTM nengeri enda lama agi.

Advertisement