Taja pan Tiong sebagi ari pemesai parti ti enda lantang ati tang kaul seduai presiden tegap: Igai
KUCHING: Kaban Parti Demokratik Progresif Sarawak (SPDP) anang arapka berita selebubu ke madah, Sapit Presiden parti, Datuk Seri Tiong King Sing deka betengali alan ngelaban presiden ti mega Menteri Pemansang Rama, Tan Sri William Mawan maya Gempuru Tiga Taun Sekali (TGA) bulan Disember tu ila.
Kebuah bisi munyi berita bansa nya, laban sekeda pemesai enggau kaban parti ke enda sepenemu enggau presiden sereta pemesai parti ke mutuska pemulai Datuk Peter Nansian, Datuk Sylvester Entri, Rosey Yunus enggau Paulus Palu Ngumbang ke dalam parti, bisi enda ngenyenangka sekeda.
Sapit Sekretari Besai SPDP, Paul Igai madah, berita ke madahka Tiong deka betengali alan ngelaban Mawan maya TGA nya ila, enda patut nyadi laban ditemu iya, Mawan seduai Tiong bebakih.
“Enda patut seduai iya deka betengali alan maya TGA. Ke ditemu aku kededua pemesai parti tu ngembuan kaul ke tegap.
“Mensia, enda patut arapka cherita selebubu baka tu. Ke ditemu aku, seduai iya bekerejasama ngemansangka parti,” ku Paul.
Ba sekeda kaban parti ke enda puas ati laban presiden parti ke nerima pemulai raban G4 (Nansian, Entri, Rosey enggau Paulus), ku Paul, pekara nya nadai besangkut paut tang iya diputar enggau manah ulih kededua pemesai tu, ku iya.
“Ke berat, iya nya semua kaban parti dipinta ngetanka penyerakup parti, lalu enda ibuh bekelikuh nyabung orang belaya,” ku iya.
Nansian lebuh ditanya timbal iya bekaul enggau pengerembai berita nya diatu, iya madah, nadai sebarang timbal ke deka diberi lebih agi dalam pekara parti, lalu baka nya mega enggau Entri.
Berita ke madahka kaban parti ke sepiak Tiong diatu bebendar endar ngulihka sukung ari pun menua ngelobi sukung ari kaban pampang milih Tiong ba penuduk presiden maya TGA nya ila.
Lalu pia mega, penyukung Tiong bebendar ngulihka sukung ari Saratok enggau Limbang ngambika Tiong dipilih nyadi presiden.
Tiong lebuh dikerandau pasal pekara nya, semina madah: “Kita nemu ngaga cherita bansa nya, tampung aja meh dia….Laban berita nya berita ‘syok sendiri’. Nemu ngaga cherita, nemu nampung iya,” ku Tiong, ke enggai nimbal pasal pengerembai berita nya.
Dalam berita ke didinga nya, penyukung Tiong beratika TGA tu palan ke betul alai Tiong betengali alan enggau Mawan, ketegal enda lantang ati nerima pemulai G4, ke kala dibuai ari parti.
Tiong ti mega nyadi ‘Special Envoy’ ke Menteri Besai (PM) keTaiwan, South Korea enggau Jepun, entara pemesai parti ke berasai enda lantang ati enggau pemutus Mawan nerima pemulai G4 nya.
Tambah mega, dalam sebuah portal berita, Tiong madahka iya enda kala disengkaum ngaga pemutus nerima pemulai G4 nya ke dalam parti.
Lalu ukai semina nya aja, seraban kaban SPDP ngarika 30 pampang parti bisi madah ke sida iya enda lantang ati nengah surat ke dianjung ngagai Bilik berita, laban chara nerima pemulai G4 nya enda kena ba sida.
G4 mulaika diri ngagai SPDP udah sida iya mutus ati deka pulai baru maya aum enggau presiden parti ke sama digulu Kepala Menteri, Tan Sri Datuk Amar Adenan Satem, lalu ditetapka pulai baru ngagai SPDP kena 19 March tu tadi.