ARANG ENGGAU ABU AJA: Tu aja tinggal Rh Andin, Sungai Engkalat, berindik ari penusah angus nya.
SAUP NGELEMPUNG: Dr Annuar (tiga kiba) nyuaka barang pakai ngagai TR Andin seraya dikemataka (ari kiba) Stanley enggau Azihani.
Lebuh meri saup ngagai orang ti tasah, perintah enda milih chura kulit tauka jalai pengarap sida
SIBU: Menteri di Opis Menteri Besai Datuk Seri Shahidan Kassim udah enggau nelap ati nyuaka pemeri enggi iya empu ngagai peranak rumah panjai Adin Jawa, Sungai Engkalat, ti dituntung penusah angus empai lama ke udah.
Tuai Rumah (TR) Adin Jawa ngarika 145 iku peranak rumah panjai iya nerima bantu duit ke disua Sekretari Peribit Datuk Seri Shahidan Kassim, Azihani Datuk Ali.
Lebuh dikerandau pemberita, Azihani madah, nengah pemeri nya nandaka nadai seraka pemisah antara Semenanjung Malaysia enggau Sarawak tauka Sabah.
“Datuk Seri Shahidan Kassim, Menteri di Opis Menteri Besai ke mekuh pengawa bantu penusah tuntung tasah di Malaysia enggau nya ngenataika penyinu ati ngagai peranak Rumah Adin.
“Bantu tu dikearapka ulih ngelempungka sekeda pemar ke nuntung peranak rumah panjai nya. BN ngamatka semaya mantu rayat enda ngira chura kulit tauka jalai pengarap,” ku iya.
Bela datai maya nya ADUN Nangka Dr Annuar Rapaee, Pemancha Stanley Geramong enggau Tuai Rumah Adin Jawa.
Kelimpah ari nya, Dr Annuar mega bisi nyuaka pemeri barang pemakai enggau gari ari Sekretariat Pengasih DUN Nangka enggau Sekretariat Tuntung Tasah DUN Nangka.
“Aku mega deka berandau enggau ADUN Bawang Assan Dato Sri Wong Soon Koh bekaul pekara ke deka digaga udah tu dikena bebantuka mansa angus rumah Rumah Adin,” ku iya.
Ku tampung iya baru, pemeri ke diberi peranak Sibu enda ngira jalai pengarap tauka bansa, ngayanka penyerakup ke chukup tegap.
“Aku mengkang ingat penusah angus di Kampung Dato maya Jun taun nyin ke ngeluska 44 ruang bilik enggau lebih 700 iku peranak ba genturung nya retung rumah tangga.
“Peranak Sibu udah begempung mantu meri utai dikena ngelempungka tating penusah sida. Orang Sibu ibuh ke pangan diri. Aku arapka penyerakup baka tu ulih diteruska,” terang iya.
Penusah angus nya nyadi urung pukul 8.30 pagi kena 3 April tu tadi sereta ngelusksa 22 ruang bilik.
Rumah panjai penuai lebih 60 taun, nya keterubah penusah ke baka tu nyadi di Pelilih Sibu taun tu.