SIBU: Serakup Veteran Soldadu Malaysia Sarawak (PVTMS) kemari meri bantu ngagai tiga iku kaban iya ti kena tinggang penusah angus Rumah Adin Jawa, Sungai Engkalat ditu.
Bantu nya disuaka Presiden iya, Thomas Ling Kui Eng ngagai Issau Gira, Margaret Idi enggau Bitang Ajit ba pengerami ti diatur ba bilik baum gerempung nya.
“Maya penusah angus 3 April tu tadi udah ngeretungka 22 pintu bilik. Ari penyampau nya, bisi lima pintu nya diempu veteran ATM.
“Taja pia, semia tiga ari sida nya udah ngerijista diri nyadi kaban PVTMS,” ku iya lebuh dikerandau pengarang berita ba pengerami nyuaka bantu.
Ling madahka, bantu ke diberi nya asil ari pemeri Tabung Pahlawan enggau inisiatif serakup dikena mantu enggau nyaga pengelantang kaban iya.
“Aku ngarapka bantu ulih ngelempungka pemerat kaban serakup ti betapi enggau penusah angus apin lama ke udah,” ku iya.
Bejaku baru, iya madahka PVTMS seruran komited sereta beratka pengelantang, guna enggau penanggul ti ditapi kaban senipak enggau rambai jaku ‘Ahli Didahulukan, Kebajikan Diutamakan’.
“Nya alai aku amat minta tauka meransang veteran ATM ti bedau ngerijista diri nyadi kaban patut berundingka pekara nya jampat laban semua pengelantang dijaga,” ku iya.
Ngenang pekara bukai, Ling muji pengawa ti dipejalaika Opis Kaunsil Bandaraya Sibu (MPS) ke dipegai Datuk Tiong Thai King denggau sapit iya, Datuk Andrew Wong Kee Yew ti selalu semak enggau rayat.
“Semua penyakah enggau pemendar bejalaika pengawa ulih dipeda nengah macham projek ti dipejalaika baka ngemanahka jalai belakin di tengah mengeri, nyendiaka perengka guna di Pasar Sentral enggau ke bukai.
“Semua tu udah tentu nguntung sereta meri pengelantang ngagai peranak mengeri Sibu. Berindik ari tu aku meransang peranak Sibu ngambika terus nyukung perintah ke pemesang ti nadai sekat,” ku iya.