SIBU: Gerempung Pengelikun Rama (SOCSO) udah mansutka RM2.22 billiun dikena mayar pampas ngagai raban ke timpang pendiau ketegal bakal ba penusah ke enda disadang nyadi ba serata menua taun seiti nyin tadi.
Menijar Besai Bagi Korporat Socso Mohd Rosdi Mat Yasin madah, pampas nya dibayar nengah Skim Bencana Pekerjaan enggau Skim Ilat.
“Penyampau tu niki ari RM2 billiun ba taun 2012 suba nengah sekim ke sebaka.
“Tu mandangka Socso ngembuan tanggungpengawa ke besai ngintu pengelikun raban pengereja pengawa,” pia ku iya madah.
Iya mantaika jaku nya maya pengerami bejadika Program Socso begulai enggau Ketuai Raban Bansa ba Dewan Suarah Sibu, ensana.
Bela bisi datai maya pengerami tu iya nya Menija Socso Sibu Dundang Undong enggau menija kes Socso Sarawak Abu Bakar Poji.
Ngenang program nya, Mohd Rosdi madah, program nya beguna dikena meri penerang ke nyemetak bekaul enggau Sosco ngagai ketuai raban bansa.
Ku iya, sida chakah nejuka semua raban ti udah ngerijister ba Sosco ngena penguntung ari sida enggau manah.
“Bisi sekeda ari lima milliun iku pengereja pengawa enda nemu penguntung ke bisi disediaka Socso.
“Nya alai, kami ngasaika program tu engkeman diatur begulai enggau tuai raban bansa,” ku iya madah.
Iya nambah Socso mega chakah mantu sida ti tau nerima bantu ari sida.
“Ambika banding, kelimpah ngulihka penerang ari raban pengaji kami mega ngulihka penerang bekaul enggau penusah bebadi pengereja pengawa ba surat berita.
“Nengah penerang nya kami deka madah ngagai pampang opis kami bejalaika pengawa ti bekaul,” pia ku iya madah baru.