DUA BELAS PARTAI BEREBUTKA SITAK PARLIMEN INDONESIA: Pengereja pengawa ari Opis pengawa bepilih menua Indonesia kiruh nyendiaka diri ngitung undi.
KUCHING: Pengawa Bepilih (Parlimen) menua Indonesia ke belabuh 6 April tu tadi udah ngepunka tiap iku rayat Indonesia di serata dunya dipinta ngundi, di Kuching taja tebal peranak Indonesia gawa ditu, kurang ari 50 peratus sida tu bisi nurun ngundi.
Chairman Pengawa Bepilih Indonesia di Sarawak, Fathan Soetrisno madah, kebuah di Kuching, penyampau rayat Indonesia enda mayuh nurun ngundi nyangka sekeda ari sida iya enda dikemendar pengaji sida limpang tauka sekeda nya gawa di Kuching nadai pemit.
Dijangka nurun muai undi 6 April tu tadi, tagit opis Jeneral Republik Indonesia ditu, urung 1,200 tang semina 460 aja ke nurun ngundi (kurang ari 60 peratus).
“Taja pia, pengawa ngundi maya Pengawa Bepilih (Parlimen) Indonesia bejalai enggau manah sereta likun,” ku Fathan madah maya dikerandau ba atur pengawa ngira undi di opis konsulat nya ditu, kemari.
Iya madah chara rayat Indonesia ngundi di menua tu iya nya nengah tiga iti chara: Datai ngagai opis konsulat di Kuching (belabuh ari 6 April ke nagit 1,200 pemilih tang ke datai semina 460), chara kedua iya nya nengah undi pos alai surat undi dianjung ngagai rayat Indonesia ke gawa di serata menua Sarawak (urung 8,000 surat pos udah dianjung, lalu naka ke diatu semina 1,200 iti keretas undi udah dianjung pulai) lalu chara ketiga, iya nya nengah ‘Mobile Ballot Box’, alai opis pengawa bepilih menua nya nganjung surat undi terus ngagai orang gawa di kilang, kebun di serata menua Sarawak (chara tu ke pengabis efektif).
“Kebuah iya pengabis efektif, laban opis pengawa bepilih menua nya nganjung urung 91,000 surat nengah ‘Mobile Ballot Box’, lalu sida iya ngundi di kilang, kami nganti lalu mai pulai baru kutak undi nya.
“Ari 91,000 tu, 90,000 udah datai ba kami (nyauka 95 peratus),” ku iya.
‘Mobile Ballot Box’ belabuh dianjung kena 30 March tu tadi lalu dianjung ngagai pelilih menua di Bintulu, Miri, Lawas enggau sekeda endur bukai, lalu udah abis pengawa ngundi, kutak undi nya dibai pulai baru ngagai opis konsulat ditu, lalu iya disimpan ba opis tu datai ngagai 11 April baru iya belabuh dibuka.
Fathan madah timpuh ngundi di Indonesia sigi lama laban sida iya agi ngena sistem ‘manual’ lalu nya kebuah, pemutus semua undi semina deka ditemu (ke parlimen) entara 16-18 April tu ila.
Ba pengawa ngira undi ‘Mobile Ballot Box’ deka dikira dalam kandang tiga hari tu.
Lebuh ditanya ngagai Fathan, bakani ku rayat Indonesia ke gawa ditu nemu sapa ke deka di undi sida iya kelimpah ari semina meda surat undi aja, ku iya:
“Orang politik di Indonesia jarang bekimpin kitu taja pan kami udah suah madah ngagai sida iya, laban beratika mayuh rayat Indonesia ke gawa ditu.
“Nya alai, lebuh kami ke kebun ngagai sekeda rayat Indonesia ke gawa lebuh nerang ngagai sida iya pasal pengawa bepilih, sida nanya ‘Ni bagi chalun?’,” ku iya.
Pengawa bepilih (parlimen) Indonesia (PEMILU tauka nama panjai iya, Pemilihan Umum),bisi 12 parti ke bediri, lalu sekeda parti nya, nyangka bisi entara 2-8 iku chalun ke deka bediri.
Parti politik di Indonesia ke bediri sekali tu (parlimen), iya nya Partai NasDem, Partai Golongan Karya, Partai Persatuan Pembangunan, Partai Kebangkitan Bangsa, Partai Gerakan Indonesia Raya, Partai Hati Nurani Rakyat, Partai Keadilan Sejahtera, Partai Demokrat, Partai Bulan Bintang, Partai Demokrasi Indonesia Perjuangan, Partai Amanat Nasional, enggau Partai Keadilan dan Persatuan Indonesia.
“Naka ke diatu, pengawa bepilih tu taja pan mayuh pengurang, kami mujur bekimpin ngelalau rayat Indonesia di Sarawak nurun ngundi.
“Sekali tu ke muai undi, manggai 91 peratus enti dibanding enggau lima taun tu ke udah ke semina 51 peratus aja,” ku iya.