KUCHING: Klinik Pengerai Petra Jaya (KKPJ) Kelas Dua di Jalan Siol Kanan, Petra Jaya udah berengkah bejalaika atur pengawa pengerai sereta nerima orang berubat kenyau 31 March tu tadi, ti nyendiaka kereban perubat moden.
KKPJ mega bisi nerima pesakit luar, Klinik Pengerai Indai enggau Anak, palan endur X-Ray (Pengimejan Diagnostik), nerima orang sakit ngenyit, Patologi, Farmasi, Servis Khas, Rehabilitasyen enggau klinik ngeli.
Nambahka nya kafeteria, bilik aum, surau, bilik endur indu nukar lampin enggau nusu ke anak mega bisi disedia kelimpah ari agu ti ditukuh siru ke Orang Nyelai Pendiau (OKU).
Klinik Pengerai Petra Jaya (KKPJ) dibuka ari pukul 8 pagi-5 lemai (Hari Satu-Hari Empat) lalu pukul 8 pagi–4.30 lemai (Hari Lima), ditutup maya Hari besai.
Klinik nya ulih nerima urung 1,000 iku orang ti datai berubat dalam sehari, lebih agi ari peranak di kandang Petra Jaya sereta sida ti ngelingi.
Digaga ba palan pemesai 2.36 ika ke disikap enggau kereban moden, mega bisi 173 palan ngengkahka kereta.
Klinik nya keterubah digaga ngena langkar baru ti begunaka ungkus belanja sepenyampau RM34 juta ba pengelama 34 bulan.
Bepelasarka Tinjau Utusan Borneo, orang ti berubat ba palan nya puas ati enggau perengka guna sereta penyikap bukai ti disediaka KKPJ.
Bisi mega bepenemu KKPJ udah meri pilih ngagai sida peranak di kandang menua ti kena bungkur Petra Jaya lebih semak endur berubat dibandingka enggau berubat jauh ngagai Sepital Besai tauka Poliklinik ba kandang endur bukai.
Taja pia orang ti berubat ngarapka piak opis pengerai enggau klinik nya ulih chakah sereta ngangkatka pemanah servis ba KKPJ.
John Anchai, 25, ke diau ba Genturung Pendiau Siol Kandis lebuh dikerandau madahka diri puas ati ba perengka guna ti bisi disediaka ba KKPJ.
Iya madahka KKPJ nya semak ari rumah enti dibandingka ngelama tu jauh sereta besekut ba jalai alun enti deka berubat ngagai Poliklinik di Jalan Masjid.
Taja pia iya ngarapka piak sepital enggau ti bekaul ulih jampat mutarka penanggul ba servis di KKPJ, ke pengelantang orang mayuh ti berubat ba klinik nya.
“Semua perengka guna ti disediaka ba KKPJ tu ‘ok’, tang servis naka ke diatu agi lubah. Ngarapka mayuh agi bilik beperesa dibuka laban orang sakit enda ulih nganti lama.
“Seiti agi, aku ngarapka piak sepital ulih berunding sereta bisi perambu deka muka KKPJ maya malam hari, laban kelalu jauh ari kandang endur kami sereta baka sida ari Santubong deka berubat ngagai Septal Besai Sarawak,” ku iya.
Nambahka nya, sepenemu enggau John, Gewel Lapeng, 53, lebuh dikerandau madah, perengka guna ti disediaka udah chukup tang servis patut dikemanahka agi.
Iya ngarapka piak bekaul ulih nambahka enggau jampat pengereja pengawa ba KKPJ ngambika mensia enda betapi enggau pengelubah.
“Perengka perubat ditu endang Gred ‘A’ tang servis agi lubah.
“Aku berubat ngagai klinik tu laban semak ari rumah, sebedau tu aku selalu ngagai Poliklinik di Buntal,” ku iya ti berubat nyadi pesakit luar.
Kelimpah ari nya, Uja Jatin, 30, ti nganjung dua iku anak iya ba bagi Pengerai Anak enggau Indai mega madahka diri sama puas ati ngagai perengka perubat ti disediaka.
“Ditu manah sereta mayuh bilik endur meresa anak enggau indai,” ku iya ti bisi dua iku anak beumur urung setaun lebih ngagai dua taun lebih.
Ba sebengkah aum pengarang berita ujung bulan March tu tadi, Direktor Opis Pengerai Sarawak, Datu Dr. Zulkifli Jantan madah, Klinik Pengerai Petra Jaya deka nyendiaka servis sebaka enggau Klinik Pengerai Tanah Putih enggau ke bukai.
Nitihku iya ba aum pengarang berita nya iya madahka KKPJ deka bisi Kuching Community Based Centre ungkup anak mit ti nyelai pendiau, ti dipindah ari Klinik Indai enggau Anak Jalan Jawa.