KUCHING: Genturung Pendiau Siol Kandis (GPSK), Petra Jaya deka ngatur pengawa beserumpu Mantar Gawai Dayak 2014 ti berambaika leka jaku ‘Begempung Ngemansangka Bansa Dayak’, diatur kena 10 Mei tu.
Nitih penerang ari Penghulu Philip Entawan, pengerami mantar Gawai Dayak 2014 deka diatur di Dewan SDNU Jalai Bukit Siol, ditu.
Iya madah, nyerumba pengerami mantar Gawai Dayak 2014 mayuh macham atur program dipejalaika ari pagi nyentuk ke siang.
Entara pengawa ti diatur muakka siang iya nya baka nyumpit, main Futsal, sepak takraw, badminton enggau kebukai kelimpah ari main asal Iban ti dipekitka malam hari 10 Mei nya.
“Nyerumba pengawa beserumpu Mantar Gawai Dayak 2014 tu, kami bisi ngatur Pekit Kumang enggau Keling sereta pekit ngajat.
“Bala bujang enggau dara ti deka masuk pekit kumang enggau keling tau ngambi pom ba kami lalu dianjung sebedau tauka kena 25 April tu,” ku iya lebuh dikerandau nengah telefon seraya madahka nya diatur renggat genturung pendiau.
Pengabang ti dipebasa dipelabaka deka dikanggau ngagai pengerami tu iya nya Menteri Kerja Raya, Datuk Fadillah Yusof, ku iya.
Nambahka nya iya madah, pengerami mantar Gawai Dayak nya tebuka ngagai mensia mayuh kelimpah ari peranak genturung pendiau nya empu.
Sebarang tanya enggau penerang silik bekaul enggau pengerami Mantar Gawai Dayak 2014 Renggat Genturung Pendiau Siol Kandis tau betanya ngagai Tuai Rumah Alexander Blassan ba lumur 019-8610920, Sekretari Audrey Wilson 013-5667141 enggau Pengulu Philip 016-8654931.