Taja napi mayuh pengerugi ba penusah nya sida ngelalau soldadu ke udah pinchin masuk serakup nya
SIBU: Dua iku kaban Serakup Veteran Soldadu Malaysia Sarawak (PVTMS) ti kena penusah angus ari Rumah Adin Jawa, Sungai Engkalat madahka diri temegah ati sereta beterima kasih ngagai gerempung nya ti mantu sida.
Margaret Idi, 53, ti kala nyadi soldadu Wataniah ari taun 70 menya madah, penusah ti nyadi urung pukul 8.30 malam kena 3 April tu tadi udah ngeretungka rumah panjai sereta reta tengkira sida serumah.
“Rumah ti endur aku enggau laki sereta tiga iku anak kami diau ngelama tu lesap sekijap mata nyengkaum reta tengkira bukai,” ku iya lebuh dikerandau pengarang berita pengudah pengerami meri bantu ari PVTMS, kemari.
Iya beterima kasih ngagai PVTMS ti meri bantu ke lalu ulih ngelempungka mimit penusah ti ditapi sida sebilik.
Bitang Ajit, 53, kala masuk Pasukan Simpanan Angkatan Tentera Malaysia (ATM) ari taun 1981 minta veteran PVTMS ti bedau ngerijista nyadi kaban ngambika jampat ngerijista diri.
“Laban enti ngerijista diri nyadi kaban PVTMS, pengelantang kaban lebih dijaga. Aku ngarapka veteran ATM ti bedau nya patut ngerijista diri nyadi kaban,” ku iya.
Ngenang baru pasal penusah angus api lama, Bitang madah, sida sebilik ti bisi tiga iku nadai dirumah maya nya laban udah nurun gawa.
“Penusah nya udah ngeretungka palan pendiau kami sereta semua reta tengkira. Nya alai, aku beterima kasih ngagai inisiatif PVTMS ti meri bantu,” ku iya.
Pengerami meri bantu nya dipenyadika Presiden PVTMS, Thomas Ling Kui Eng ke diatur ba bilik baum serakup nya.