Atur tu dikena ngenegapka adat, main asal, jaku enggau jalai pengidup bansa Iban meruan belama
KUCHING: Sapit Direktor, Pengawa Pemansik Jaku enggau Sastera, Dewan Bahasa dan Pustaka (DBP) Sarawak, Shantrol Abdullah madah, adat, main asal, jaku enggau jalai pengidup bansa Iban ulih tegap sereta meruan belama enti pengawa pemansik sereta dokumentasyen dipejalaika.
Udah nya, ku iya, asil lalu dipandang ngagai orang mayuh lebih agi rebak baru enggau dudi kelimpah ari patut dikemeran sereta dikemeratka peranak bansa Iban.
“Jaku sereta jalai pengidup bansa Iban jemah ila enda mudah punas nyema jaku enggau sastera bekaul enggau bansa tu dipansik, didokumentasyen sereta dipandang ngagai mensia mayuh lalu bulih gelar ari macham piak.
“Dikena ngenukuka tu enda punas, raban bansa Iban empu patut mandang, ngemeran sereta ngemeratka jaku enggau jalai pengidup (adat enggau main asal) diri, laban enti ngarapka bansa bukai baka ngajat enggau ke bukai, nyangka bisi timpang mimit sereta bebida.
“Enti semua tu dikemeran sereta dikemeratka bansa Iban, aku ngasaika pemunas enda nyadi laban di Sarawak kitai meda jaku, adat enggau main asal endang nyadi kelai enggau penegap bansa Iban,” ku iya lebuh dikerandau pengarang berita.
Nitihku iya, DBP Pampang Sarawak bisi bejalaika pansik enggau dokumentasyen bekaul enggau jaku sereta sastera Iban.
Sastera Iban ke dipansik nyengkaum sastera asal baka cerita kelulu, lagu, jampi, pantun enggau ke bukai lalu sastera moden ti nyengkaum jerpan enggau ke bukai, kelimpah ari rintai leka jaku.
“Kededua pekara nya patut didokumentasyen lalu tu amat beguna laban orang ke nampung nya nembiak rebak baru enggau dudi.
“Enti enda didokumentasyen kitai takut ila lenyau lalu asal ke ditampung ari orang ke tuai nadai ba rebak baru enggau dudi,” ku iya.
Kelimpah ari nya iya madah, DBP Pampang Sarawak endang bekempit enggau Opis Menteri Pelajar ngangkatka jaku Iban enggau sastera ba renggat sekula sereta Institut pelajar tinggi, ti nyadi sebengkah subjek.
Nambahka nya iya madah, dikena narit rebak baru rinduka sastera asal patut nitihka singkang pemansang dunya.
Raban nembiak patut dibai mandangka sastera asal tang ngena chara moden sereta chara ke ulih diterima sida, ku iya.
“Kitai mengkang ngetan sereta ngena isi asal tang chara mandangka kitai patut nitihka dunya kemaya hari tu, nya ulih narit pengerindu rebak baru,” ku iya.