SIBU: Raban Nembiak Parti Pesaka Bumiputera Bersatu (PBB) Sarawak bela gerah jari nyuaka bantu ngagai peranak Rumah Adin Jawa, Sungai Engkalat ketegal ditinggang penusah angus empai lama ke udah.
Bantu chek ke beungkus RM7,500 disuaka Sekretari Politik Kepala Menteri ti mega Exco Raban Nembiak PBB Nengeri Sarawak Romeo Tegong ngagai Tuai Rumah Adin.
Pengawa tu dikemataka Kaban Exco Raban Nembiak PBB Nengeri ti mega Ketuai Raban Nembiak PBB Pampang Dudong Abdul Ghani Sulhi, Ketuai Raban Nembiak PBB Pampang Bawang Assan Sammy Dennis enggau Kaban Nembiak PBB Nangka Ali Mat.
Ali Mat ke mega Direktor Tabung Baitulmal Sarawak pampang Sibu kena hari Lima tu tadi bisi nyuaka bantu gari ngagai peranak rumah panjai nya.
Rumah Adin di Sungai Engkalat tu kira bisi lapan kilometer penyauh ari pasar Sibu udah angus kena 3 April, urung pukul 8.30 pagi.
Taja pan baka nya semina 18 pintu aja angus ari 70 ruang bilik di rumah panjai nya.