Nengah atur tu, SESCO dikearap ulih ngurangka tarif elekterik ti tau ngelantangka rayat, ku Wong
SIBU: Pengawa ngemaruhka penyakah Parti Tindakan Demokratik (DAP) Sarawak ngulihka sukung rayat nengah kimpin sain jari enda patut nyadi.
Sekretari Pekara Pemadah DAP Pampang Sibu David Wong madah, kimpin tu diatur ngambika rayat ulih ngasaika polisi bekal karan ti enda bechiping.
Ku iya, kimpin nya mujur nejuka SESCO ngatur aum baka ni mutarka pekara nya.
“Kelimpah ari nya, pekara tu mega nyadi isu besai maya Pengawa Bepilih Mit (PRK) Balingian empai lama tu tadi ti ngujungka pengari Barisan Nasional bebendar nerang ngagai pengundi ngambika bela ngenggaika kimpin sain jari kami ti deka meda bayar karan dikurangka agi,” pia ku iya maya dikerandau.
Ari nya ku iya, kimpin tu mujur ngansak perintah bebendar mutarka pekara nya.
Nya alai, iya minta rayat ba nengeri tu ngulu sereta nyukung kimpin sain jari nya ke udah dipenyadi bulan seiti nyin tadi.
Nyentuk ke diatu Wong madah, kimpin sida mujur matak 60,000 iti sain jari ba serata nengeri.
“Kami merambu deka bulih 100,000 iti sain jari lalu ngarapka rayat ulih nyukung kimpin kami tu,” ku iya madahka baru.
Maya tu mega sekali agi Wong madah, kimpin nya diatur ngambika SESCO ulih ngubah polisi enggau nurunka bayar karan 30 peratus.
Ku iya, SESCO meli bekal karan ari Tekat Ai Bakun enggau rega RM0.065 se-kWj tang dijual ngagai rayat enggau pukul rata RM0.30 genap kWj.
Pekara tu ngujungka SESCO bulih untung beratus milliun ninting taun.
Ba taun 2009, ku iya, SESCO bulih untung sebedau bayar chukai kira bisi RM217 milliun lalu ba taun 2010 (RM336 milliun) enggau ba taun 2012 iya nya RM266 miliun.
“Untung tu bepun ari rayat mayar karan enggau rega ti besai ari sida meli. Perintah patut meda pekara tu ngambika pengidup rayat lantang agi,” ku iya madah.
Wong madah, maya kimpin nya baru berengkah suba BN baka ke enda ibuh tang diatu perintah empu semampai nitihka pejalai pemujur kimpin nya.