KUCHING: Mayuh piak datai meri bantu ngagai sida Chai Min Chiap, 47 enggau bini iya Veronica Gaweng, 36, sereta empat beranak pengudah berita pasal sida sebilik pansut ba Utusan Borneo kemari.
Menteri Pengintu Pengelantang Pendiau, Orang Indu enggau Pemansang Ruang Bilik, Datuk Fatimah Abdullah madahka diri amat gaga sereta temegah ati ngagai mayuh opis nyengkaum komiti peranak ti meri bantu ngagai ruang bilik nya.
Nitihku iya, komiti endur nya udah beserakup mantu ngaga rumah Min Chiap sebilik tiga hari ti udah (ke benung digaga) lebuh berita pasal sida iya mega pansut dalam sebuah surat kabar China dulu ari nya.
“Ukai semina nya aja, kitai gaga ati lebuh bisi peranak gerah jari meri kereban rumah ke udah dikena ngagai sida sebilik. Penegap runding ti baka tu meh ke dikedeka kitai.
“Kelimpah ari nya, sida mega deka nyendiaka bantu pengangkut dikena anak sida nurun ke sekula,” ku iya.
Iya mansutka pekara nya pengudah meda ngena mata diri gaya pengidup sida Min Chiap sebilik ti udah diau ba rumah baru di Genturung Pendiau Segedup, Batu Kawa ditu kemari.
Bejaku baru Fatimah madah, ari piak iya, Opis Pelilih Mit Menua deka ngambi penerang pasal sida sebilik lalu dirijista ngagai lis seranta mengeri ngambika dipasukka dalam sistem e-Kasih.
“Pengudah dirijista ila, kitai mantu sida lebih agi Veronica ngambika enggau masuk program Akhiri Zaman Miskin (AZAM) awakka ulih nambahka penatai pemisi laki kelimpah ari bulih bantu ari perintah,” ku iya.
Kelimpah ari nya, Opis Pelilih Mit Menua mega deka meri tangki ai 1Malaysia laban naka ke diatu paip bedau ulih disambung ngagai rumah baru.
Ngenang pekara nya baru, Fatimah madahka iya deka ngenukuka anak melaki bini nya teulihka pelajar.
“Kami deka berandau enggau piak sekula lalu ngarapka sida ulih nemu sereta mereti penanggul ti ditapi anak tu kelimpah ari dibai betemu enggau lutur ngambika diperesa (nyema bisi penanggul belajar),” ku iya.
Dulu ari nya, berita pasal ruang bilik nya diau ba sebuah rumah ti repuk sereta nadai perengka guna pengelama 10 taun lalu empat iku anak iya nya Luai Chai, 11, Chai Jew Huat, 9, Chai Xiao Yan, 8, enggau Chai Joo Chan, 5 mega dibai ari Simunjan lalu diau ba rumah nya setaun ke udah.
Berengkah ari nya, sida sebilik idup dalam petang tiap malam sereta nat ke penyelap enggau enda ulih tinduk enti ujan laban rumah nya tuduh kelimpah ari ti nadai bekal ai beresi.
Sida sebilik semina bepanggai ngagai penatai pemisi laki iya ti kereja kunterik di kilang semin di Sungai Moyan enggau gaji RM28 sehari, pia mega laki iya betapi enggau sakit nesak ke kekadang enda ulih gawa lebuh penyakit nya datai.