SIBU: Rejimen 510 Soldadu Wataniah (Rejimen 510 AW) udah ngatur pengawa ngerijista Soldadu Wataniah beserimbai enggau Pekit Safari Rakit Baleh-Kapit di Kapit, ujung minggu tu tadi.
Nyerumba Pekit Safari Rakit Baleh-Kapit ke diatur kena 5 ngagai 6 April tu tadi Rejimen 510 AW mega nirika seruyuk alai mensia betanya enggau nyemetak senentang pengawa nyadi Soldadu Wataniah.
Bela bisi ngulu atur pengawa tu iya nya Sapit Komander Rejimen 510 AW Leftenan Kolonel Rusman Sanip.
Tuju pengawa ngerijista tu diatur iya nya dikena nambahka penyampau Soldadu Wataniah kelimpah ari matak raban nembiak ke empai bepengawa.
Kelimpah ari nya, Menteri Pemansang Tanah Tan Sri Dr James Masing mega bisi datai ngelawa program Rejimen 510 AW tu.
Masing disempulang Kaban Parlimen Hulu Rajang Wilson Ugak Kumbong enggau Kaban Kunsil Nengeri (ADUN) Ngemah Alexander Vincent.