KUCHING: Sarawak dipilih endur ngatur ‘International Federation of Landscape Architects (IFLA)2014 Asia Pacific Congress’ kena 28 – 30 April tu, deka dipenyadika Kepala Menteri Tan Sri Datuk Amar Adenan Satem.
Kongres ti diatur ba sebengkah hotel tebilang ti berambaika jaku “A Greener Tomorrow” diatur begulai entara Institute of Landscape Architects Malaysia (ILAM) enggau IFLA.
Presiden ILAM 2012/2104 Mohd Fadrillah Mohd Taib madahka, kebuah milih rambai jaku “A Greener Tomorrow” nya laban amat semak sereta senipak enggau nengeri Sarawak enggau Sabak ti ngembuan pengawa ba rampa menua enggau pengeraja asal.
Iya bepenemu rampa menua enggau pengeraja asal nya ulih nyadika penyungkak ekonomi nengeri.
“Kami nagit urung 500 iku orang ari 16 bengkah menua serata dunya tu nyereta kongres tu ila. Naka ke diatu (kemari) urung 300 iku udah ngerijista diri, lalu kami arap bendar ulih nyapai tagit nya laban bisi tiga minggu agi endur diatur.
“IFLA 2014 tu ila deka dipenyadika Kepala Menteri kena 28 April.
“Rambai jaku ‘A Greener Tomorrow’ dipilih dikena nyapai kualiti sereta pengidup ti tegap nengah perspektif seni bina lanskap. Sub rambai jaku dibagi ngagai tiga pekara iya nya Teknologi, Dagang temuai enggau Pesaka Asal,” ku iya.
Fadrillah mansutka pekara nya dalam aum pengarang berita IFLA2014 ti diatur ba bilik aum Sarawak Convention Bureau ditu, lemai kemari.
Nambahka nya iya madah, kongres nya dibuka ngagai mensia mayuh nyengkaum raban arkitek landskap, kontraktor landskap, pemekal landskap, arkitek, injinir, ejensi perintah, malin temuai, pengempu hotel & resort, pemansik sereta enggau raban nembiak enggau ke bukai.
“Penerang silik pasal tu lalu orang mayuh ti deka nyereta IFLA2014 dipinta ngerijista ngena chara online ba www.ifla2014.asia,” ku iya seraya madahka aum digulu ari empat bengkah bagi menua iya nya Eropah, Amerika, Afrika enggau Asia Pasifik.
Nitih penerang iya, Tun Dr. Mahathir Mohamad ti kala nyadi Menteri Besai deka meri Prime Keynote : Malaysia: ‘A Greener Tomorrow, lalu Theme Keynote : Best Practice For Greener Tomorrow’ deka dikenataika Chih-Wei G.V. Chang ari USA.
Keynote bekaul enggau Green Technology deka dipejuraika Professor Dr. Nor Azazi Zakaria ari Malaysia, Green Tourism (Dr. Diane Menzies – New Zealand) enggau Greener Heritage dipejuraika Professor Dr. Ismawi Zen (Malaysia).
“Nyerumba kongres tu Tun Dr. Mahathir deka nerima ‘ILAM-IFLA Award of Distinction’ beduduk ari ti manyuh udah mantu ngemasangka landskap di Malaysia.
Nambahka nya ‘Malaysia Landscape Architecture Awards and ILAM Gala Night’ kena 29 April ti deka digulu Menteri Kesejahteraan Bandar, Perumahan dan Kerajaan Tempatan Malaysia Datuk Abdul Rahman Dahlan.
Nyerumba IFLA2014 Acia Pacific Congress, entara aktiviti bukai bisi diatur iya nya International Student Charrette ti bepalan ba Sarawak Cultural Village; IFLA Asia Pacific Regional Council Meeting; International Student Design Competition Exhibition; Malaysia Landscape Architure Awards & ILAM Gala enggau nemuai ngagai palan dagang temuai di mengeri tu.
Sama bisi dalam aum pengarang berita nya kemari, Mandal presiden IFLA 2012 – 2014 Datuk Ismail Ngah.