Anda di sini

Jerip: Taja kes denggi apin balat ngelekai, mensia mayuh patut ngemeratka pemeresi

Advertisement

SARANG NYAMUK: Nyengkaum butul tauka kerubung kusong patut dibuai ba endur ke betul, nyengkaum rumput patut ditebas.

KUCHING: Menteri Muda Pengerai Mensia Mayuh ti mega Kaban Kunsil Nengeri (ADUN) Bengoh madah, penyampau kes denggi di Sarawak agi ba tikas ke ulih ditagang tang ngelalau rayat ngemeratka pemeresi lebih agi kandang luar rumah diri.

Dr Jerip madah, genturung pendiau ke ditemu  betapi enggau penyakit denggi iya nya di Kampung Tabuan Tengah, Kampung Cemerlang, Kampung Tupong di Kuching, nyengkaum Rumah (Rh) Mantin, Rejang Park enggau Jalai Poh Yu di Sibu.

Ku iya, ba pun minggu bulan March, bisi mandangka pengelekai nambah ngagai 11 kes lalu di minggu ketiga ba bulan ke sama mega ngerikod 14 kes lalu penyampau nya nyadi 25 kes ari pemayuh 313 kes di serata menua, naka ke diatu.

Taja pan diatu, genturung pendiau Kpg Tabuan Dayak agi ‘beresi’ tang semua peranak genturung nya patut ngemeratka pemeresi kandang pendiau diri dikena nyeliah kes berampit.

Peter Reggie, 47, seiku mekanik madah, parit ke betakat ba rumah sida laban ai ke enda rarat enggau manah, lalu tambah enggau uras ke dibuai orang ke dalam parit, ngujungka parit nya maya lemai hari mayuh nyamuk.

Iya madah enti nitih, parit ba mua rumah sida nya patut ditebas datai ke hujung tang ke diatu, semina ditebas mimit aja.

Kelimpah ari nya, iya madah tanah ke puang besepiak enggau rumah sida (bisi orang ngempu tang orang nya nadai diau dia) patut mega ditebas ngambika enda alai nyamuk betelu.

“Enti nitih, laban sida (orang ke ngempu tanah) enda diau di Kuching, nyangka sida iya ulih ngaji orang bukai nebas ke sida. Laban rumput ke panjai nya, lalu ditambah enggau orang sepiak-sepiak bebuaika uras ba tanah puang nya mega tau nyadi sarang nyamuk,” ku iya madah lebuh dikerandau Utusan Borneo ditu, kemari. Pun anak Chambai, 79 madah, kekadang ba sentang pemeresi, penemu seseiku enda sebaka. Pun ke diau besepiak enggau mayuh rumah suwa madah, uras ke dibuai ke dalam parit datai ari rumah suwa, lalu uras nya enda ulih rarat ke bukai laban parit ke kelalu mit.

“Ulah kitai enda sebaka, laban kekadang kitai ke nyuwa tu enda pedulika pemeresi ngelingi kitai, laban ukai reta tengkira sida, pia ku jaku….Nya alai jaku lalau berat endar,” ku Pun ke endang asal genturung pendiau Tabuan Dayak nya empu.

Tuai Kampung Kpg Tabuan Dayak Tengah, Peter Encharang madah, baru kemari sida ketuai raban bansa nyengkaum iya empu bisi enggau Opis Pelilih Menua baum pasal penyakit denggi ke bisi ditemu udah bisi kes nyadi di Bandaraya Kuching, di Kpg Tabuan Tengah, Kampung Cemerlang enggau Kpg Tupong.

Ku Peter, sebedau genturung pendiau Tabuan Dayak ditemu bisi kena denggi, mensia mayuh ke diau di genturung pendiau nya dilalau meresi ngelingi rumah diri, lalu anang bebuaika uras sebarang alai nyengkaum anang nejuka tin puang tauka sebarang utai ti tau ngundan ai ngachir sebarang alai, laban tau endur nyamuk betelu.

Iya nandu baru, maya ujung minggu tu ila (kena hari Enam), iya ngelalau mensia mayuh ke diau di genturung pendiau Tabuan Dayak beripai meresi ngelingi rumah diri, lalu minta komuniti di genturung pendiau dia, nugungka uras ba tisi jalai ngambika ulih diangkut luri MBKS.

“Kelebih agi komuniti Tabuan Dayak, taja pan kitai diau dalam genturung pendiau ditu, bisi sekeda nya endang orang asal ditu, lalu bisi sekeda nya nyuwa aja, aku ngelalau mensia mayuh ke diau di Kpg Tabuan Dayak (tengah) minta sida iya nyikap, meresi luar kandang rumah diri lalu anang meri awak nyamuk betelu.

“Manah agi kita nyendiaka diri empu ari betapi enggau penanggul kena sakit denggi,” ku iya.

Advertisement