MIRI: Komuniti Orang Ulu empu patut ngubah chara enggau jalai pengidup diri ngambi teulihka pengidup ke menyana agi jemah ila.
Kaban Kunsil Negeri Telang Usan Dennis Ngau Jok madah, orang enda ulih nyaup kitai enti kitai enda ngubah diri.
“Enti diberi peluang berubah dudi ila, kita patut berundingka diri empu, sekalika ulih nerima nya tauka enda,” ku iya lebuh bejadika Seminar Nyadi Ketuai Enggau Pemansang Kenyah Nuju 2030 di Hotel Dynasty ditu, empai lama ke udah.
Lebuh ngenang sentang peranak menua Baram, iya madah, sida benasit amat enti nemu nguna peluang ba projek besai ke diperambu perintah.
Dennis mega madah, ulah ke enda nerima sereta enggai berubah nadai meri sebarang penguntung lebih agi ba nembiak rebak baru.
Peda meh gaya pengidup dalam kandang 50 taun ke udah, balat pemerinsa enti dibanding enggau gaya pengidup ke diatu.
Iya mega madah, pemansang ke dibai perintah ukai kena ngenusah rayat.
“Aku nemu perintah (Besai enggau nengeri) ngembuan juluk ke pemadu manah bejalaika transformasyen menua Sarawak enggau Baram,” ku iya.
Beserimbai enggau pengerami nya, Dennis ngungkupka Geran Projek Pemansang Menua Pesisir (MRP) RM 10,000 ngagai raban pengatur seminar, iya nya Serakup Bansa Kenyah Sarawak (PKKS) ngambika bisi dikena sida bejalaika atur pengawa dalam gerempung nya.
Bela bisi ngulu seminar nya Presiden PKKS Marcus Gau Lian, Sekretari Politik Kepala Menteri Robert Laing Anyie enggau Temenggung Joseph Ngau Lian.