Anda di sini

SADIA Sarikei ngatur serumpu Mantar Gawai Dayak 26 April tu

Advertisement

SARIKEI: Gerempung Dayak Iban Sarawak (SADIA) Pampang Sarikei deka ngatur Malam Mantar Gawai Dayak 2014.

Program nya deka diatur kena 26 April, pukul 7 lemai ba Dewan Suarah Sarikei.

Sapit Menteri Pemansang Menua Pesisir enggau Kandang Menua, ke mega Kaban Parlimen Kapit, Datuk Alexander Nanta Linggi deka nyadi temuai ti dipebasa bejadika Pengerami Makai lemai nya ila.

Berebak enggau pengerami nya mega bisi diatur Pekit Kumang Gawai 2014.

Pekit nya dibuka indu dara ke bebansa Iban ti beumur entara 18 nyentuk ke 25 taun.

Sesapa ke bisi ati deka masuk pekit nya tauka betanyaka penerang ke silik sereta minta pom tau telefon ngagai Sekreteri SADIA Pampang Sarikei, Sering Jimalang nengah lumur 013 8056062, Durita Awell (014 8906290) enggau Bangie Mujab (013 8174449).

Kelimpah ari nya, atur pengawa bukai ti deka disempulangka maya pengerami nya ila baka bepantun, ngajat, nyabut tikit benasit, beperindang enggau ‘live band’, karaoke, golden voice sereta mayuh agi main bukai.

Berebak enggau nya, SADIA mega deka nyuaka insentif ngagai bala anak kaban SADIA ke bulih pemutus ke manah ba peresa perintah taun seiti nyin tadi.

Ungkup kaban SADIA ti bisi anak ke patut nerima insentif nya, sida tau betanya sereta minta pom ngagai Gara Tindin nengah lumur 013 8114172.

SADIA Sarikei bisi nyendiaka beberapa buah mija ti muat endur sepuluh iku. Sebuah mija nya dijual enggau rega RM400.

Raban pengatur pengawa nya mega ngelaluka pampang SADIA, Gerempung Ukai Dikuasa Perintah  (NGO) enggau gerempung bukai ngulu pengerami nya ila.

Penerang ke silik sereta minta galauka mija tau ditujuka ngagai komiti pengatur pengerami baka Chairman SADIA Sarikei, Clement Hillary nengah lumur 012 8473497, Cassimir Igat (019 4394619) enggau Tang Lee Hing (019 8592438).

Advertisement